सरकारले दल फुटाउन सहज हुनेगरी राजनीतिक दलसम्बन्धी ऐन संशोधन गर्न अध्यादेश ल्याउने भएपछि सत्तारूढ नेपाल कम्युनिष्ट पार्टी (नेकपा) मा हलचल मच्चिएको छ ।

मन्त्रिपरिषद बैठकले अध्यादेश ल्याउने निर्णय गरेलगत्तै सरकारमा सहभागी भएका पूर्वमाओवादी मन्त्रीहरुको छुट्टै छलफल गरेको स्रोतले बताएकाे छ । स्रोतका अनुसार छलफलपछि पूर्वमाओवादी नेताहरू प्रचण्ड भेट्न खुमलटारतर्फ लागेका छन् । पछिल्लो घटनाक्रमसँगै नेकपा भित्रको आन्तरिक विवादले उत्कर्ष रूप लिएको छ ।

नेकपाका दुई अध्यक्षबीच मतभेद बढिरहेका बेला सोमबार बसेको मन्त्रिपरिषद् बैठकले संसदीय दल वा केन्द्रीय समितिमध्ये एकमा ४० प्रतिशत पुर्‍याए पार्टी फुटाउन मिल्ने प्रावधान राखेर अध्यादेश ल्याउने निर्णय गरेको थियो ।

हालको कानुनमा राजनीतिक दल विभाजन हुनलाई संसदीय दल र केन्द्रीय कमिटी दुवैमा ४० प्रतिशत संख्या अनिवार्य पुर्‍याउनुपर्ने प्रावधान छ ।

प्रकाशित समय १६:३२ बजे