सत्तारूढ दल नेपाल कम्युनिष्ट पार्टी (नेकपा)को सचिवालय बैठक प्रधानमन्त्री निवास बालुवाटारमा केही बेरअघि सुरु भएको छ । बैठकमा बजेट, एमसीसी र भारतले नेपाली भूमि अतिक्रमण गरेको विषयबारे छलफल हुने बताइएको छ ।

बैठकमा वरिष्ठ नेता झलनाथ खनाल नेतृत्वमा बनेको एमसीसी सुझाव कार्यदलका सदस्यद्वय भीम रावल र प्रदीप ज्ञवालीलाई पनि बोलाइएको छ । बजेट अधिवेशनबाटै एमसीसीको टुंगो लगाउने सरकारको तयारी छ । सचिवालय बैठकले नेपाल-भारत सम्बन्धका विषयमा पनि छलफल गर्नेछ ।

त्यस्तै बजेटका विभिन्न पक्षमा छलफल गर्नुपर्ने भएकाले आजको बैठकमा अर्थमन्त्री डा. युवराज खतिवडालाई पनि बोलाइएको छ ।

यसअघि जेठ २ गते बसेको सचिवालय बैठकले सरकारको नीति तथा कार्यक्रमलाई अन्तिम रूप दिएको थियो । लिम्पियाधुरा, कालापानी र लिपुलेकलाई समेटेर नयाँ नक्सा जारी गर्ने विषयलाई पनि सोही बैठकले औपचारिकता दिएको थियो ।

प्रकाशित समय १६:१० बजे