गृहपृष्ठ समाचार प्रभाव : किसानको पैसा फिर्ता गर्न मेयरको निर्देशन
समाचार प्रभाव : किसानको पैसा फिर्ता गर्न मेयरको निर्देशन
किसानको पैसा किसानलाइ फिर्ता गर्ने वडा अध्यक्षको भनाइ
धनुषास्थित सबैला नगरपालिकामा गहुँको मूल्यमा अनियमितता भएको खुलासा भएपछि नगरप्रमुख विजयसंंकर प्रसाद साहले रकम फिर्ता गर्न निर्देशन दिएका छन् । सम्पूर्ण वडा अध्यक्षहरुलाइ बोलाएर नगरपालिकाको निर्देशन विपरित लिएको रकम फिर्ता गर्न प्रमुख साहले निर्देशन दिएका हुन् ।
किसानलाई ५० प्रतिशत अनुदानमा गहुँको बीउ उपलब्ध गराएको सबैला नगरपालिकाले एक हजार ४ सयको दरले ४० किलोको बोरा किसानलाइ बिक्री गर्न भने पनि वाडा नम्बर १, २, ३, ६, १० र ११ मा प्रति बोरा थप २ सय बढी असुली गरेको पाइएको थियो । नगरपालिकाले ७६ रुपैया प्रति किलो खरिद गरेको गहुँ किसानलाइ ५० प्रतिशत अनुदानमा उपलब्ध गराउन निर्देशन दिएको थियो ।
नगरपालिकाले ५० प्रतिशत अनुदानपश्चात ४० किलो गहुँको बोरालाई ३५ रुपैयाँ किलोका दरले प्रति बोरा एक हजार ४ सयमा बेच्न निर्देशन दिएकामा वाडा अध्यक्षले आफूखुशी मनपर्दी बेचेको स्थानीयको गुनासो न्युज कारोबार डटकमले प्रकाशित गरेको थियो । त्यसपछि मंगलबार बेलुका नै बढी लिएको रकम फिर्ता गर्न निर्देशन गरिएको साहले न्युज कारोबारलाई जानकारी दिए ।
नगरपालिकाले एक हजार ६ सय बोरा अर्थात ६ टन ४ क्विन्टल गहुँ खरिद गरी किसानलाइ अनुदानमा बिक्री गरिएको छ । यता, वडा नम्बर-१ का अध्यक्ष पारस साहले आफूहरुलाई एक हजार ४ सयमै नगरपालिकाले बेच्न भने पनि लोड अनलोड र ओसारपसारमा लागेको खर्च कसले व्यवहोर्ने स्पष्ट नभएर गल्ती भएको स्वीकार्दै आफ्नो वडा लगायत केही वडाले बढी लिएको रकम किसानलाइ फिर्ता गर्ने बताएका छन् । वडा-१ मा एक सय पन्ध्र बोरा गहुँको बीउ बिक्री गरिएको छ ।
प्रकाशित समय १९:२७ बजे

















