धनगढी उपमहानगरपालिका १२ स्थित जुगेडा अस्थायी प्रहरी चौकीमा कार्यरत प्रहरी जवान रामबहादुर साउदको पनि शव फेला परेको छ । शनिवार साँझ ८ बजे मोटरसाइकलमा गस्तीमा गएका बेला बेपत्ता भएका उनको शव आज फेला परेको हो ।

मोहना नदीमा डुबिरहेको अवस्थामा प्रहरी जवान साउदको शव फेला परेको वरिष्ठ प्रहरी उपरीक्षक मुकेश सिंहले जानकारी दिए ।  अहिले शव निकाल्ने काम भइरहेको प्रहरीले जनाएको छ ।

सँगै ड्युटीमा निस्किएका प्रहरी सहायक निरीक्षक (असई) गोविन्द विक आइतबार बिहान मृत अवस्थामा मोहना नदीमा फेला परेका थिए । तस्करहरूद्वारा हत्या गरिएका उनको अन्त्येष्टि पनि गरिसकिएको छ ।

अभियुक्तको बयानअनुसार सुरुमा प्रहरी जवान साउदमाथि आक्रमण गरेको पाइएको छ । प्रहरीले लिएको बयानका अनुसार तस्करहरूले घेरा हालेर असईमाथि आक्रमण गरेको, सुरुमा जवानको हत्या गरी उनलाई पनि मोहना नदीमा फालेको पाइएको हो ।

त्यसपछि असईको पनि हत्या गरेर मोहनामै फालेका अभियुक्तहरूले बयान दिएका छन् ।  आइतबारदेखि प्रहरी टोली र स्थानीय साउदको खोजीमा लागेका थिए ।

प्रकाशित समय १२:०६ बजे