नेपाल प्रहरीका तीन डीआईजी प्रहरी अतिरिक्त महानिरीक्षक (एआईजी)मा बढुवा भएका छन् ।

शुक्रबार राति सम्पन्न मन्त्रिपरिषद्को बैठकले बढुवा सिफारिस समितिको सिफरिस अनुसार नै पुस्कर कार्की, ठूले राई र धिरु बस्नेतलाई एआईजीमा बढुवा गरेको हो । सिफरिसमा पुस्कर कार्की पहिलो, ठूले राई दोस्रो र धिरु बस्नेत तेस्रो नम्बरमा परेका थिए ।

यो सँगै कार्कीले अब प्र्रहरी मुख्यालयको कार्य तथा अपराध अनुसन्धान विभाग सम्हाल्नेछन् भने राईले मानव स्रोत तथा प्रशासन विभाग र बस्नेतले प्रहरी प्रशिक्षण प्रतिष्ठानको कमाण्ड सम्हाल्ने भएका छन् ।

मन्त्रिपरिषद्को बैठकले माथिल्लो अरुण आयोजना विद्युत प्राधिकरणको सहायक कम्पनी अप्पर अरुण हाइड्रो इलेक्ट्रिक मार्फत बनाउने निर्णय गरेको सरकारका प्रवक्ता गोकूल बास्कोटाले जानकारी दिए ।

बैठकले गत बिहिबार सुनसरीमा गोली प्रहार गरी हत्या गरिएका खुर्सिद अन्सारीलाई सहिद घोषणा गरेको छ भने परिवारलाई राहतस्वरुप १० लाख रुपैयाँ दिने निर्णय गरेको छ ।

लामो समयको बहसपछि सरकारले थिंक ट्यांक गठन गरेको छ । सरकारले यसलाई नीति अनुसन्धान प्रतिष्ठान नाम दिएको छ । प्रतिष्ठानमा प्रा. डा. चैतन्य मिश्र, डा. मिना आचार्य, प्रा. डा. राजेन्द्रध्वज जोशी, प्रा. डा. सुरेन्द्र लाभ र डा. गणेशमान गुरुङ सदस्य छन् । थिंक ट्यांकले सरकारलाई सुझाव दिने काम गर्नेछ ।

यस्तै मन्त्रिपरिषद् बैठकले प्रधानमन्त्री ओलीको अमेरिका भ्रमण स्वीकृत गरेको छ ।

प्रकाशित समय ०७:२९ बजे