ब्राजिल कोपा अमेरिका फुटबलको फाइनलमा प्रवेश गरेको छ ।

साविक उपविजेता अर्जेन्टिनालाई २–० गोलअन्तरले पराजित गर्दै ब्राजिलले कोपाको फाइनलमा स्थान सुरक्षित गरेको हो । पहिलो हाफमा ब्राजिलले १–० गोलको अग्रता बनाएको थियो । दोस्रो हाफमा एक थप्न ब्राजिल सफल भयो ।

खेलको १९ औं मिनेटमा ब्राजिलका लागि ग्याब्रीएल जेससले गोल गरे । कप्तान ड्यानी आल्भेसले उत्कृष्ट बल नियन्त्रण गर्दै फिर्मिनो र फिर्मिनोले पेनाल्टी क्षेत्रभित्र दिएको लो क्रसलाई जेससले पोस्टको दिशा दिए ।

खेलको ३० औं मिनेटमा अर्जेन्टिनाले खेल बराबरीमा ल्याउने अवसर गुमायो । लिओनेल मेसीले पेनाल्टी क्षेत्रभित्र दिएको बलमा सर्जियो अगुएरोले गरेको हेडर क्रसबारमा लागेर फर्कियो । दोस्रो हाफको ७१औं मिनेटमा रोबर्टो फिर्मिनोले गोल गर्दै ब्राजिलको जित सुनिश्चित गरे ।

अब ब्रजिलले चिली र पेरुबीचको विजेतासँग फाइनलमा प्रतिस्पर्धा गर्नेछ ।

प्रकाशित समय ०८:०९ बजे