नेपाली क्रिकेट खेलाडी सन्दीप लामिछाने बिग बास लिग (बिबिएल) खेल्न अर्को साता अस्ट्रेलिया जाने भएका छन् । तेस्रो पटक बिग बास खेल्ने तयारीमा रहेका सन्दीप मंगलबार कतार एयरवेजबाट अस्ट्रेलिया जानेछन् ।

अस्ट्रेलिया पुगेपछि उनी १४ दिन क्वारेन्टिनमा बस्ने व्यवस्थापक रमन शिवाकोटीले जानकारी दिए । यसपटक सन्दीप होबार्ट हुरिकन्सबाट बिग बास खेल्दै छन् । यसअघि उनले लगातार दुई सिजन मेलबर्न स्टार्सबाट बिग बास खेलेका थिए । दसौँ संस्करणको बिग बास लिग आजदेखि सुरु भइसकेको छ । पहिलो खेलमा सन्दीप आबद्ध हुरिकन्सले सिड्नी सिक्सर्सलाई १६ रनले पराजित गरेको छ ।

क्वारेन्टिनमा बस्नुपर्ने भएकाले सन्दीपले केही खेल गुमाउनुपर्ने व्यवस्थापक शिवाकोटीले बताए । उनले पछिल्ला दुई सिजनमा २० खेल खेल्दै २६ विकेट लिएका थिए । यसअघि सन्दीपले साउनमा क्यारेबियन प्रिमियर लिग (सिपिएल) खेलेका थिए । ट्रिनिडाड एन्ड टोबागोमा भएको सिपिएलमा उनले जमैका तलाबाजमा आबद्ध भई ११ खेलमा १२ विकेट लिएका थिए । सिपिएलपछि उनी युनाइटेड अरब इमिरेट्समा सञ्चालन भएको इन्डियन प्रिमियर लिय (आइपिएल)मा सहभागी भए । दिल्ली क्यापिटल्समा आबद्ध सन्दीपले यसपटक आइपीएलमा कुनै पनि खेल खेल्ने अवसर पाएनन् ।

राष्ट्रिय टोलीको बन्द प्रशिक्षणमा सहभागी हुने तयारीमा रहेको अवस्थामा दुई साताअघि सन्दीप कोरोनाबाट संक्रमित भए । हाल उनी कोरोनामुक्त भइसकेका छन् । (रासस)

प्रकाशित समय १८:४४ बजे