नेपाली क्रिकेट खेलाडी सोमपाल कामीले युनाइटेड अरब इमिरेट्स (यूएई )को आबुधाबीमा जारी  टि १० लिगमा दुई विकेट लिएका छन् । डेकेन ग्लाडिएटर्सविरुद्धको खेलमा दुई विकेट लिए पनि उनी आबद्ध मराठा अरेवियन्स भने २९ रनले पराजित भएको छ ।

मराठाले टस जितेर पहिला फिल्डिङ रोजेपछि डेकेनले निर्धारित १० ओभरको खेलमा चार विकेट गुमाएर १२० रन बनायो । १२१ रनको विजयी लक्ष्य पछ्याएको मराठाले १० ओभरमा तीन विकेट गुमाएर ९१ रन बनाउन सक्यो । नेपालका बलर कामीले उत्कृष्ट खेल प्रदर्शन गरे । उनले एउटै ओभरमा दुई विकेट लिएका हुन् ।

कामीले डेकेनका प्रशान्त गुप्ता र यासिर कलिमको विकेट लिए । व्यक्तिगत पहिलो ओभरमा उनले दुई रन खर्चिए । दुई ओभर बलिङ गरेका कामीले १० रनमात्र दिए । जारी टी १० लिगमा हालसम्म ६ खेलमा उनले तीन विकेट लिएका छन् ।

यूएईमा जारी टी १० लिगमा कामीका साथै नेपाली राष्ट्रिय क्रिकेट टोलीका पूर्वकप्तान पारस खड्का, कुशल मल्ल र करण केसी खेलिरहेका छन् । खड्का टी १० टिम आबुधाबीको इमर्जिङ ट्यालेन्ट मेन्टरको भूमिकामा छन् । मल्लले आबुधाबी र केसीले पुने डेभिल्सबाट प्रतियोगिता खेलिरहेका छन् ।

प्रकाशित समय ०६:४९ बजे