करिम बेन्जेमाको दुई गोल मद्दतमा रियल मड्रिडले जिरोनालाई ३–१ ले पराजित गर्दै कोपा डेल रे फुटबलको सेमिफाइनलमा प्रवेश गरेको छ । रियलले जिरोनालाई समग्रमा ७–३ को अन्तरले हराउँदै अन्तिम चारमा स्थान बनाउन सफल भएको हो ।

रियलले पहिलो लेगमा ४–२ को जित निकालेको थियो भने गएराति भएको खेलमा रियलले तीन गोल गरेको थियो । २७औं र ४३औं मिनेटमा करिम बेन्जेमाको गोल गरेका थिए । ७१औं मिनेटमा जिरोनाका युवा खेलाडी पेड्रो पोर्राेले गोल गर्दै खेललाई २–१ मा ल्याए पनि ७६औं मिनेटमा मार्काेस लोरेन्टेले ड्यानियल सेवालेसको पासलाई सदुपयोग गर्दै रियललाई ३–१ को जित दिलाए ।

यससँगै कोपा डेल रेको सेमिफाइनलमा पुग्ने चार टोलीको टुंगो लागेको छ । रियलले अब रियल बेटिससँग खेल्नेछ भने अर्काे सेमिफाइनलमा बार्सिलोनाले भ्यालेन्सियासँग प्रतिस्पर्धा गर्नेछ ।

यसैबीच, फ्रेन्च फरवार्ड करिम बेन्जेमा स्पेनिस क्लब रियल मड्रिडको छैटौ सर्वाधिक गोलकर्ता बनेका छन् । स्पेनिस कोपा डेल रे अन्तरगत बिहीबारको खेलमा जिरोनाविरुद्ध २ गोल गरेसँगै बेन्जेमा २०९ गोल गर्दै रियलको छैटौं सर्वाधिक गोलकर्ता बनेका हुन् ।

बेन्जेमा सन् २००९ देखि रियलमा आबद्ध रहेका छन् । बेन्जेमा भन्दा अघि क्रिस्टियानो रोनाल्डो (४५१), राहुल (३२३), डि स्टेफानो (३०७), सान्टिललाना (२८८) र पुस्कास (२३७) रहेका छन् ।

प्रकाशित समय ०८:१९ बजे