१३ औं दक्षिण एसियाली खेलकुद प्रतियोगिता (साग) को भलिबलअन्तर्गत पुरुषतर्फको स्पर्धामा नेपाल बंगलादेशसँग पराजित भएपछि सर्भिसमा बढी गल्ती भएको कप्तान इम रानामगरले प्रतिक्रिया दिएका छन् ।

अब सेमिफाइनल पुग्न भारतलाई हराउँनै पर्ने बाध्यता रहेको छ । तर, कप्तान ईमले पहिलो खेलमा पराजित भएपनि दोस्रो खेलमा भारतविरुद्ध उत्कृष्ट खेल्ने लक्ष्य रहेको बताए ।

निकै प्रतिस्पर्धात्मक रहेको खेलमा बंगलादेशले घरेलु टिमलाई ३–२ ले पराजित गरेको हो ।

हरेक सेटमा सुरुवाती अंक प्राप्त गर्न सफल बंगलादेश सुरुवाती ३ सेटमा २–१ ले पछि परेको अवस्थाबाट कमब्याक गर्दै ३–२ ले जित हासिल गर्न सफल भएको हो । पहिलो सेटमा उत्कृष्ट प्रदर्शन गर्दै २५–२१ ले जित निकालेको नेपालले अग्रता जोगाउन नसक्दा हारबाट प्रतियोगिताको सुरुवात गर्न वाध्य भयो ।

दोस्रो सेटमा ५ वटा सर्भिस बिगार्दै बंगलादेशलाई अंक दिएको नेपाल २५–२३ ले पराजित भएको थियो । उच्च मनोबलसहित तेस्रो सेट खेलेको नेपालले २५–१९ को सहज जित हासिल गरेको थियो ।

निकै प्रतिस्पर्धात्मक रहेको चौथो सेटमा पछि परेको अवस्थाबाट कमब्याक गर्दै नेपालले जितको सम्भावना देखाए पनि अन्त्यमा २६–२४ ले बंगलादेशलाई जित सुम्पिएको थियो । बंगलादेशले जितेसँगै खेल २–२ को बराबरीमा आएको थियो ।

पाँचौं तथा अन्तिम सेटमा भने नेपालले तेस्रो र चौथो सेटमा जस्तो प्रदर्शन गर्न सकेन । सुरुबाटै फराकिलो अग्रता लिन सफल भएपछि बंगलादेशले उच्च मनोबलका साथ जिततर्फ अग्रसर भयो ।

अन्तिम सेटको अन्त्यतिर भने उत्कृष्ट ब्लकिङ गर्दै नेपालले खेलमा फर्किने सम्भावना देखाएको थियो । तर, बंगलादेशले पुनः आफ्नो लयमा फर्किदै १५–१२ को जित दर्ता गर्न सफल भयो ।

प्रकाशित समय ०८:४२ बजे