सरकारले आगामी आर्थिक वर्षको बजेटमा धितोपत्र बजारप्रति सकारात्मक सोचका साथ नीति तथा कार्यक्रम समावेश गरे पनि त्यसको प्रभाव परेको छैन । जेठ १५ गते आगामी आवको बजेट सार्वजनिक भएपछि सेयर बजारमा कारोबार मापक नेप्से परिसूचक ४४.३२ अंकले ओरालो लागेको छ ।

बजेटपछि बजार नौ दिन खुला रह्यो । बजेटले केही नीतिगत व्यवस्था गरे पनि बजार भने निरन्तर ओरालो लागेको छ । यो साता पनि बजारको मापक सूचक ओरालो लागेरै बन्द भएको छ । केही कम्पनीको सेयर भने निरन्तर वृद्धि भइरहेको छ ।

गत साताको बिहीबार १२८४.५९ अंकमा रहेको नेप्से परिसूचक यो साताको अन्तिम दिन बिहीबार १२६९.५५ अंकमा झरेको छ । गत बिहीबारदेखि यो साताको बिहिबारसम्म बजार १५.०४ अंकले घटेको हो ।

आइतबार काठमाडौँ उपत्यकमा सार्वजनिक बिदा परेका कारण सेयर बजार बन्द रह्यो । सोमबार खुलेको बजारमा कारोबार मापक नेप्से परिसूचक ८.७८ अंकले घट्यो । सोमबार विकास बैंक, उत्पादन तथा प्रशोधन र सामूहिक लगानी कोष उपसमूहमा सामान्य सुधार आए पनि बाँकी सूचक ओरालो लागेका थिए । १७३ वटा कम्पनीको १८ लाख ५९ हजार २४८ कित्ता सेयर ५८ करोड ८८ लाख २२ हजार ६२५ मूल्यमा कारोबार भयो ।

यस्तै, मंगलबार नेप्से परिसूचक ०.१७ अंकले बढेर एक हजार २७५.९८ अंकमा थामियो । मंगलबार १७४ कम्पनीका १५ लाख नौ हजार ८८५ कित्ता सेयर ४८ करोड आठ लाख ७६ हजार ९८६ मा किनबेच भयो ।

बुधबार पुनः नेप्से ३.५ अंकले घटेर १२७२.४८ अंकमा पुग्यो । १७४ कम्पनीका १८ लाख ७१ हजार ८०९ कित्ता सेयर ५० करोड २६ लाख ८२ हजार ८८१ मा कारोबार भयो । कारोबार भएका १२ उपसमूहमध्ये तीन उपसमूहको मात्रै सेयर बढ्यो ।

बिहिबार पनि बजारले ओरालोको यात्रा तय ग-यो । बिहीबार नेप्से परिसूचक २.९२ अंकले घटेर १२६९.५५ अंकमा झ-यो । १७० कम्पनीको १४ लाख २३ हजार ६८७ कित्ता सेयर ४५ करोड ६५ लाख छ हजार ९४५ मूल्यमा खरिद–बिक्री भयो ।

यो साता स्वाभिमान लघुवित्त वित्तीय संस्थाको ६ लाख १८ हजार ६१० कित्ता साधारण सेयर, नेपाल कम्युनिटी डेभलपमेन्ट बैंकको ५२ हजार ६४० कित्ता सेयर बोनस र युनियन हाइड्रो पावरको ७५ लाख कित्ता साधारण सेयर नेप्सेमा सूचीकृत भएको छ ।

प्रकाशित समय १६:५१ बजे