मालपोत कार्यालय जुम्लाका तत्कालीन निमित्त कार्यालय प्रमुख एवं मालपोत अधिकृत गोविन्दप्रसाद न्यौपानेसहित १६ जनाविरुद्ध विशेष अदालत काठमाडौंमा भ्रष्टाचार मुद्दा दायर भएको छ । जुम्लाको गुठीचौरमा रहेको भेडाबाख्रा फार्मको ५९० रोपनी जग्गा परिवारको नाममा नामसारी गर्ने मालपोत अधिकृत न्यौपानेसहित १६ जनाविरुद्ध अख्तियारले मुद्दा दायर गरेको हो

न्यौपानेले ५९० रोपनी सरकारी जग्गा श्रीमती, छोरी र नातागोताको नाममा पास गराएको अख्तियारको ठहर छ । न्यौपानेसँगै मालपोत कार्यालय जुम्लाका खरिदार एवं अहिलेको मालपोत कार्यालय चाबहिलका नायब सुब्बा विजय शर्मा न्यौपाने र भेडा बाख्रा अनुसन्धान कार्यक्रम गुठिचौर जुम्लाका तत्कालीन कार्यालय प्रमुख यमुनाकुमार श्रेष्ठलाई जनही ४५ लाख रुपैयाँ बिगो तोकिएको छ ।

जग्गा दर्ता गरी लिने हरिहर न्यौपानेलाई २ लाख २५ हजार बिगो तोकिएको छ । मुनीशचन्द्र न्यौपाने, मायालाल न्यौपाने विष्णु ऋषि न्यौपाने, विष्णुलाल न्यौपाने, नवऋषि न्यौपाने र कविदत्त न्यौपानेलाई जनही ३ लाख रुपैयाँ बिगो कायम गरिएको छ । यस्तै, विष्णु न्यौपानेलाई ४ लाख ९५ हजार, पार्वती न्यौपानेलाई ५ लाख २२ हजार, गोमा न्यौपानेलाई ५ लाख २७ हजार, देवेन्दप्रसाद उपाध्यायलाई १ लाख ९९ हजार, केशवराज न्यौपानेलाई २ लाख र जानकीदत्त देवकोटालाई ३० हजार रुपैयाँ बिगो तोकिएको छ ।

उनीहरुलाई जनही १० वर्ष कैद सजाय र जग्गाको मूल्यबराबरको बिगो र जरिबाना तोकिएको अख्तियारका प्रवक्ता प्रदीपकुमार कोइरालाले जानकारी दिए ।

प्रकाशित समय ०६:५३ बजे