गैरआवासीय नेपाली संघ (एनआरएनए) को सातौं एसिया प्यासिफिक क्षेत्रीय बैठक तथा दोस्रो क्षेत्रिय महिला भेला जुलाई ६ र ७ मा म्यानमारको याङगुनमा आयोजना हुँदैछ । बैठकको तयारी तीव्र गतिमा अघि बढेको एसिया प्यासिफिक क्षेत्रका आरसी किरणविक्रम थापाले जानकारी दिए ।

एसियाली मुलुकमा रहेका गैरआवासीय नेपालीको सहभागितामा नेपालमा लगानी प्रवर्धन गर्ने मुख्य उद्देश्यका साथ बैठक आह्वान गरिएको हो । यसपटकको बैठक ‘नेपालको समृद्धिका लागि डायस्पोरोको भूमिका’ भन्ने विषयमा केन्द्रित हुने थापाले बताए ।

बैठकमा ठूल्ठूला आयोजना एवं व्यवसायको लगानीमा भन्दा पनि साना तथा मझौला व्यवसायको लगानी र त्यसमा देखिएका नीतिगत अप्ठ्यारा अनि सम्भावनाबारे विशेष छलफल हुने बताइएको छ ।

यस्तै एसियाली मुलुकका श्रम बजारमा नेपाली श्रमको प्रयोगमा रहेका समस्या पहिचान गर्दै समाधानका लागि पनि छलफल गरिने थापाले जानकारी दिए । विगतमा गरिएका निर्णय र प्रतिबद्धताको समीक्षा पनि बैठकमा हुनेछ । नेपालको समृद्धिमा डायस्पोराको भूमिका कृषि, पर्यटन, एसिया प्यासिफिक क्षेत्रमा नेपालीहरुको लागि श्रम बजार, त्यहाँका युवा तथा महिलाको सशक्तीकरणलगायत विषयमा पनि घनीभूत छलफल हुने थापाले जानकारी दिए ।

बैठकमा म्यानमारसहित थाइल्यान्ड, चीन, हङकङ, जापान, मकाउ, मलेसिया, फिलिपिन्स, सिंगापुर र साउथ कोरियासहितका एसिया प्यासिफिक क्षेत्रका सदस्य राष्ट्रलगायत अन्य राष्ट्रका पदाधिकारीको सहभागिता रहनेछ । साथै, संस्थापक अध्यक्ष, पूर्वअध्यक्षहरु, वर्तमान अध्यक्षसहितका अधिकांश पदाधिकारी, नेपाल सरकारका तर्फबाट विशिष्ट पाहुना एवं प्रतिनिधिहरु, नेपाल उद्योग वाणिज्य महासंघका प्रतिनिधि साथै अन्य व्यावसायिक विशिष्ट व्यक्तित्व, म्यानमारका राजदूत, नेपाली समुदाय सञ्चारकर्मीलगायत आईसीसी र विभिन्न एनसीसीका प्रतिनिधिसहित करिब पाँच सयको सहभागिता रहने आरसी थापाले जानकारी दिए ।

प्रकाशित समय २१:५३ बजे