सुदूरपश्चिम प्रदेशमा मेडिकल शिक्षाको विकाससँग जोडिएको कैलालीको गेटामा निर्माणाधीन मेडिकल कलेजको निर्माण कार्यमा भइरहेको प्रगतिसँगै स्थानीयवासी खुसी भएका छन् ।

निर्माण थालनीका बेला कलेज सञ्चालन हुने/नहुनेमा अन्योल सिर्जना हुँदा निराश देखिएका स्थानीयवासी पछिल्ला वर्षमा संरचना निर्माणको काम तीव्र हुँदा खुसी भएका हुन् । ‘सुरुका वर्षमा संरचना निर्माण ढिलाइ हुँदा यो योजना कार्यान्वयनमा आउनेमा शंका थियो, स्थानीय भक्तराज ओझाले भने, ‘अहिले भने काम धमाधम हुँदा कलेज छिट्टै सञ्चालन हुने आशा जगाएको छ ।’

कलेजका संरचना निर्माणले तीव्रता पाएसँगै आगामी एक वर्षभित्र सबै संरचनाको निर्माण पूरा हुन लागेको कलेज पूर्वाधार निर्माण विकास समितिका कार्यकारी निर्देशक भीमबहादुर साउदले जानकारी दिए । ‘विसं २०७७ को अन्त्यसम्ममा सबै संरचना तयार पारेर कलेज सञ्चालनको प्रक्रियामा जाने सोच बनाएका छौँ,’ कार्यकारी निर्देशक साउदले भने, ‘अहिलेसम्म ६५ प्रतिशतभन्दा बढीको निर्माण कार्य पूरा भइसकेको छ ।’

नेपाल सरकारले यस्ता कलेज सञ्चालनको ढाँचाबारे विधेयक तयार पारेर कानुनी परामर्शसमेत गरिरहेको छ । सरकारले विसं २०६६ मा कलेज स्थापनाको घोषणा गरेकामा प्रक्रियागत ढिलाइका कारण निर्माण कार्य भने तीन वर्षअघि देखि मात्रै सुरु गरिएको थियो ।

कलेजका लागि साढे तीन तलाको अस्पताल भवन, साढे पाँच तलाको कलेज भवन, दुई तलाका दुई वटा छात्रबास भवन, अढाई तलाको प्रशासनिक भवनलगायत २४ संरचना निर्माणधीन रहेका छन् ।

आउने साउन महिनासम्म कलेजको अस्पताल भवन, कलेज भवन, प्रशासनिक भवन, छात्रावासलगायत संरचना निर्माण पूरा हुन लागेको छ । चिकित्सकको आवासगृहका रूपमा आठ वटा भवन निर्माणाधीन छन् ।

अन्य कर्मचारीको आवासका लागि पनि तीन वटा छुट्टै भवन निर्माण भइरहेको छ । मेडिकल कलेज परिसरको मूल बाटो निर्माणका साथै कलेज निर्माणस्थलको उत्तरतर्फ रहेको नदीको नियन्त्रणको काम पनि सँगसँगै गर्न लागिएको छ ।

चालु वर्षमा फोहर व्यवस्थापन र पानी व्यवस्थापनको काम पनि अघि बढ्न लागेको छ । गेटा मेडिकल कलेज ६ सय शय्याको निर्माण गर्ने लक्ष्य छ । कलेजका थप भौतिक संरचना निर्माणका लागि हाल परामर्शदाता छनोटको काम भइरहेको कार्यकारी निर्देशक साउदले बताए ।

कलेजका अस्पताल भवनलगायत संरचनाको निर्माणमा शर्मा राजेन्द्रकुमार कम्पनी, लुम्बिनी कुमार केएस र रविना कन्स्ट्रक्सन प्रालि संलग्न छन् । कलेज निर्माणका लागि सरकारले छुट्याएको ५१ दशमलव आठ हेक्टर जग्गामा रहेका रूख कटानीका लागि भएको ढिलाइलगायत कारणले सुरुको अवस्थामा कलेज निर्माणसम्बन्धी पूर्वाधार निर्माणको काममा ढिलाइ भएको थियो ।

कलेजको भोगाधिकारमा रहेको जग्गामध्ये झन्डै ६ बिघामा मुक्तकमैया परिवारको बसोबास छ । उनीहरूलाई समयमै अन्यत्र पुनःस्थापना गर्ने सवालमा सम्बन्धित निकायले ध्यान नदिँदा उक्त ठाउँमा निर्माण गर्नुपर्ने संरचनाको निर्माण कार्य भने अन्योलमा छ ।

मुक्तकमैया बसेको उक्त जग्गामा मेडिकल कलेज अन्तर्गतको ट्रमा सेन्टरलगायत संरचना निर्माण गर्ने योजना रहेको बताइएको छ । मुक्तकमैयालाई अन्यत्र पुनःस्थापना गर्नेबारे छलफल भइरहेको कार्यकारी निर्देशक साउदले बताए ।

जग्गाको मूल्य बढ्यो

गोदावरी नगरपालिकाको गेटा क्षेत्रमा मेडिकल कलेज निर्माण सुरु भएसँगै आसपासको जग्गाको मूल्य अकासिँदै गएको छ । कलेज आसपासका ग्रामीण बस्तीमा एक दशकअघि प्रतिकट्ठा जग्गाको मूल्य ३ लाख रुपैयाँसम्म रहेकामा अहिले १५-२० लाख रुपैयाँसम्म पुगेको स्थानीयवासी रमेश बडेलाले बताए । ‘कलेज निर्माण सुरु भएपछि अहिले जग्गाको मूल्य छोइनसक्नु भएको छ,’ बडेलाले भने, ‘पछिल्ला वर्षमा बसाइँसराइको चाप पनि बढेको छ ।’ (सिद्धराज भट्ट/रासस)

प्रकाशित समय १५:१७ बजे