विश्व नै कोरोनाभाइरस महामारीको चपेटामा छ । यसबाट नेपालसमेत अछुतो छैन । यो विषम परिस्थितबाट कसरी पार पाउने ? भन्नेमा सबैको चिन्ता छ । महामारी अन्त्य भइहाले पनि त्यसपछि देखापर्ने आर्थिक संकट र मन्दीकाे त्रास उस्तै छ । यतिखेर हरेक मुलुकले सम्पूर्ण राज्य संयन्त्र कोरोना विरूद्धको युद्धमा एकत्रित गरेको छ ।

तर, नेपालमा भने दृष्य अलि भिन्न छ । सत्तारूढ दल नेपाल कम्युनिष्ट पार्टी (नेकपा) भित्रको आन्तरिक विवादले सरकार नै फेरबदल होला कि भन्नेसम्मको संशय पैदा गराएको छ । नेकपाका एक अध्यक्ष रहेका प्रधानमन्त्री केपी शर्मा ओली नेतृत्वको सरकारले ‘एकलाैटी’ रूपमा दुई अध्यादेश ल्याएपछि सतहमा आएको विवाद केही दिनयता छताछुल्ल बनेको छ । पार्टीभित्रको चर्काे आन्तरिक गुटबन्दी छ ।

ओलीको कदमबाट असन्तुष्ट बनेको अर्का अध्यक्ष पुष्पकमल दाहाल ‘प्रचण्ड’ र माधवकुमार नेपाल, झलनाथ खनाल र वामदेव गाैतम समूहले स्थायी कमिती बैठकको माग गर्दै आएका छन् । तर, केही सदस्य संख्याको हिसाबले केही ‘कमजोर’ देखिएको ओली पक्ष बैठक टार्ने प्रयासमा छ ।

मंगलबार दुई अध्यक्षबीच भएको भेटवार्तामा स्थायी कमिटी बैठक बस्नेबारे सहमति भएको भनिए पनि आज भने घटना क्रमले अर्कै मोड लिएको बताइएको छ । संसदीय दल र पार्टी दुवैतिर आफ्नो पक्षमा बहुमत जुटाउन अध्यक्ष ओली समूहले कसरत थालेकाे छ ।

यही क्रममा ओलीले तत्कालीन एमाले र माओवादी दुवै पक्षका सांसदहरुसँगको भेट तथा छलफललाई तीव्रता दिएका मात्र दिएका छैनन् आवश्यक परे बहुमतको दस्तावेज देखाउनेगरी  सांसदको हस्ताक्षर समेत गराइएको छ। बुधबार बिहानसम्‍म प्रतिनिधिसभा र राष्ट्रियसभाका ६० भन्दा बढी सांसदहरुले हस्ताक्षर गरिसकेको ओलीनिकट नेताहरूको दावी छ ।

नेकपाको सचिवालय बैठक बुधबार साँझ ५ बजेका लागि डाकिएको छ । बैठकमा ओलीले आफ्नो पक्षमा बहुमत सदस्यकाे समर्थन रहेकाे देखाउने तयारी गरेकाे स्रोतले बतायाे । स्राेतका अनुसार ओली पार्टी अध्यक्ष र प्रधानमन्त्री दुवै पद नछाड्ने रणनीतिमा छन् ।

प्रकाशित समय १६:२५ बजे