सुदूरपश्चिम प्रदेश सरकारले कोरोना अस्पताल घोषणा गरेका अस्पतालहरुको आइसोलेसन वार्ड कोरोना संक्रमति बिरामीले भरिएका छन् । प्रदेशका सेती प्रादेशिक अस्पताल र महाकाली अस्पतालमा क्षमताभन्दा बढी बिरामी राखिएका छन् ।

आइतबार बेलुकीसम्मको जानकारीअनुसार १७ शय्याको क्षमता रहेको अछाम जिल्ला अस्पतालमा मात्र अब ७ शय्या खाली छ । त्यसैगरी १२ शय्याको आइसोलेसन वार्ड रहेको टीकापुर अस्पतालमा १० जना संक्रमितलाई राखिएको छ ।

२४ शय्याको आइसोलेसन वार्ड भएकोमा सेती प्रादेशिक अस्पतालमा २६ जना कोरोना संक्रमित राखिएको छ । महाकाली अस्पतालमा १० शय्याको मात्र आईसोलसन वार्ड छ । तर त्यहाँ १५ जना कोरोनाका बिरामी भर्ना गरिएका छन् ।

प्रदेशका ठूला अस्पतालको आइसोलसन वार्ड भरिभराउ भएपछि थप संक्रमित भेटिए उनीहरुको व्यवस्थापनमा चुनौती देखिएको छ । प्रदेशमा कोरोना संक्रमितको सम्पर्कमा आएका र अन्य कोरोना लक्षण देखिएका हजार बढीको अझै परीक्षण भएको छैन ।

स्वास्थ्य मन्त्रालयले जारी गरेको निर्देशिकाअनुसार सुदूरपश्चिममा कोरोना संक्रमित भेटिए सेती प्रादेशिक अस्पताल पठाउनु पर्ने उल्लेख छ । तर संक्रमित बढ्दै गएपछि प्रदेश सरकारले सेती अस्पतालले मात्रै संक्रमितको व्यवस्थापन गर्न नसक्ने भन्दै स्थानीय तहलाई समेत आइसोलेसन वार्ड तयार गर्न आग्रह गरेको छ । सेती प्रादेशिक अस्पतालका कोभिड- १९ विभाग प्रमुख डा. शेरबहादुर कमरले अब लक्षण नै नभएका बिरामीलाई अस्पताल ल्याएर उपचार गर्न सम्भव नभएको बताए । ‘सबै संक्रमितलाई अस्पतालमै राखेर उपचार गर्न अब सम्भव भएन । स्वस्थ्य अवस्था सामान्य रहेका संक्रमितलाई घरमै अथवा क्वारेन्टाइनमै उपचार गर्नुको विकल्प छैन,’ उनले भने ।

सामाजिक विकास मन्त्रालय अन्तर्गतको स्वास्थ्य निर्देशनालय डोटीले सबै स्थानीय तहहरुलाई कम्तिमा ५० शय्याको आईसोलेसन तयारी अवस्थामा राख्न पत्राचार गरेको छ । आरडीटी र पीसीआर पोजेटिभ भएकालाई व्यवस्थापन गर्न कम्तीमा पनि ५० शय्याको आईसोलेसन तयारी अवस्थामा राख्न सबै स्थानीय तहलाई अनुरोध गरिएको स्वास्थ्य निर्देशक डा. गुणराज अवस्थीले बताए । अहिले सुदूरपश्चिममा देखिएका कोरोना संक्रमित लक्षणविहीन अवस्थाका भएकाले उनीहरुको स्थानीय स्तरमै उपचार तथा व्यवस्थापन गर्न सकिने उनको भनाइ छ ।

स्वास्थ्य निर्देशनालयले सामान्य बिरामीको उपचार स्थानीय स्तरमै गर्न निर्देशन गरे पनि स्थानीय तहले आइसोलेसन बनाउन सकेका छैनन् । निर्देशनालयले ढिलोगरी पत्राचार गरेको र प्रदेशमा संक्रमितको संख्या बढेका कारण स्थानीय तहले नै आइसोलेसन निर्माण गरी बिरामीको उपचार गर्न असम्भव भएको जनप्रतिनिधिहरुले बताउँदै आएका छन् ।

प्रकाशित समय १५:३० बजे