बिमा समितिकै निर्देशनमा बन्द भएको कोरोना बिमा समितिकै निर्देशनमा सुरु हुने भएको छ । सरकारले जखिम वहनमा सहयोग गर्ने प्रतिबद्धता जनाएपछि कोरोना बिमा पुनः सुरु गर्न बिमा समितिले निर्देशन दिएको हो । यसअघि दायित्व बढ्ने अवस्था आएपछि कम्पनीहरूसँगै समिति कोरोना बिमाबाट तर्किएका थिए ।

कोरोना संक्रमितहरूको उच्च गतिमा बढ्न थालेपछि शुक्रबारबाट समितिकै निर्देशनमा बिमा कम्पनीहरूले कोरोना बिमा पोलिसी बन्द गरेका थिए । कोरोना बिमा कार्यक्रम आगामी आर्थिक वर्षको बजेट वक्तव्यमा नै समावेश भएको कार्यक्रम हो । कोभिड १९ बिमामा सर्वसाधारणको आकर्षण निकै बढेको छ । बिमा कम्पनीहरूले कोभिड‑१९ को बिमा गर्न सुरु गरेको दुई महिना नपुग्दै तीन लाखभन्दा बढीले बिमा गराइसकेका छन् । हालसम्म बिमा दाबी भने कसैले गरेको छैन ।

बिमा समितिले पाँच सय रुपैयाँमा ५० हजार रुपैयाँबराबरको र एक हजार रुपैयाँमा एक लाख रुपैयाँबराबरको कोरोना बिमा गर्न सकिने व्यवस्था गरेको थियो । परिवारकै बिमा गर्दा ५० हजार रुपैयाँको लागि तीन सय रुपैयाँ र एक लाख रुपैयाँका लागि ६ सय रुपैयाँ तिर्नुपर्नेछ । बिमाको अवधि एक वर्ष हुनेछ ।

बिमितले बिमा गरेको १५ दिनपछि कोरोना (पीसीआर परीक्षण) पोजिटिभ देखिएमा बिमांकअनुसारको दाबी भुक्तानी पाउनेछन् ।

प्रकाशित समय १५:२४ बजे