विश्वव्यापी महामारी कोरोनाभाइरस (कोभिड १९) संक्रमणबाट यो साता विदेशमा थप एक जना नेपालीको निधन भएको छ । गैरआवासीय नेपाली संघअन्तर्गतको स्वास्थ्य समितिका अनुसार यो साता लग्जम्वर्गमा एक जनाको निधन भएको हो ।

शनिबार साँझसम्म विदेशमा १६ देशमा १९२ नेपालीको निधन भएको छ । अस्ट्रेलिया, स्पेन, बेल्जियम, भारत, माल्टा, कतार, साउदी अरबलगायतका देशमा कोरोना संक्रमण सामान्य वृद्धि भएको छ ।

विश्वका ३८ देशमा रहेका नेपाली कोरोनाभाइरसबाट संक्रमित भएको समितिले जनाएको छ । स्वास्थ्य समितिका संयोजक डा. सञ्जीव सापकोटाका अनुसार अस्ट्रेलिया र युरोपका केही देशमा कोभिड १९ को दोस्रो वेभ (दोस्रो लहर) सुरु भइसकेको छ । सापकोटाले कोरोनाभाइरसको संक्रमण विश्वव्यापी रुपमा फैलिरहेको अवस्थामा सबै नेपाली समुदायलाई सजक रहन आग्रह गरेका छन् ।

कोरोनाभाइरसका कारण बेलायत, युएई, साउदी अरब, बहराइन, कुवेत, कतार, आयरल्यान्ड, जापान, टर्की नेदरल्यान्ड, स्विडेन, भारत, साउथ अफ्रिकालगायत १६ देशमा रहेका नेपालीको ज्यान हो । हालसम्म नेपालबाहेक विदेशमा मात्र ३४ हजार ३०१ जनामा कोरोना संक्रमण देखिएको छ । तीमध्ये ९३.५ प्रतिशत अर्थात ३२ हजार २५३ जना कोरोनामुक्त भएको समितिले जनाएको छ ।

प्रकाशित समय १३:४५ बजे