नेपाल स्टक एक्सचेन्ज (नेप्से)का प्रमुख कार्यकारी अधिकृत (सिइओ) चन्द्रसिंह साउदले प्रविधिमा नयाँ किसिमको समस्या देखापरेको बताएका छन् । ‘मिडियाहरूले टिएमएस भनेर लेखिरहेका छन् तर टिएमएस होइन, प्रविधिमा नयाँ किसिमको समस्या देखियो,’ उनले भने, ‘टिएमएस (ट्रेड म्यानेजमेन्ट सिस्टम) र ब्याक अफिस सिस्टमबीच म्याचिङमा समस्या देखिएको हो, चाँडै समाधान हुन्छ ।’

नेप्सेले कारोबार व्यवस्थापन प्रणालीमा केही प्राविधिक समस्या आएकाले कारोबार रोक्का राखिएको भन्दै सूचना जारी गरेको थियो । अहिलेसम्म नदेखको नयाँ समस्या भएकाले केहीबेर अलमल भएको र समस्या थाहा भइसकेकाले समाधानतर्फ गइसकेको उनले बताए ।

आइतबार कारोबार खुलेदेखि नै सिस्टममा समस्या आएको थियो । जसका कारण कतिपयले बाइ र सेल अर्डरमा राखेको सेयर संख्या दोब्बर र तेब्बर परेको थियो । मल्टिपल इन्ट्री भएपछि लगानीकर्ता तनावमा छन् ।

प्राविधिक रुपमा नेप्सेका प्रणालीहरू बलिया नहुँदा लगानीकर्ताले पटक‑पटक समस्या झेल्दै आएका छन् । यसको दीर्घकालीन समाधानका लागि पहल भइरहेको नेप्सेका सिईओ साउदले बताए । तर, लामो समयदेखि समाधान खोजिरहेको बताए पनि नेप्सेले मजबुत सिस्टम निर्माण गर्न नसकेको लगानीकर्ताको गुनासो छ ।

प्रकाशित समय १४:४६ बजे