आठ वर्षअघि छेडागाड नगरपालिकाको वडावन हुँदै थाप्लो थिचिने गरी भारी बोकेर शरीरभरी पसिना बगाउँदै जुनिचाँदेको लुहादहस्थित घरमा नुन ल्याउने रेशम खड्का अहिले सोही ठाउँमा गाडीमा सवार गर्छन् । उनलाई यति छिट्टै गाउँगाउँमा सडक पुग्ला भन्नेमा एकरत्ती विश्वास थिएन । बाबासँग नुनलगायत अन्य लत्ताकपडा आफ्नै शरीरको तौलभन्दा बढी बोकेर तीन दिन लगाएर घर जाने रेशमलाई हिजोआज सोही बाटो चार घण्टाभित्र पार गरी घरमा पुग्दा अनौठो लाग्छ ।

केही समय छेडागाडमा शिक्षण गरेका जाजरकोटका पत्रकार राजेन्द्र कार्कीलाई यति पनि छिट्टै पश्चिमका गाउँगाउँमा सडक निर्माण भई यात्रा गर्न पाइएला भन्ने विश्वास थिएन । ‘पहिले पढाउँदा दुई दिन लगाएर हिँडेको बाटो हो, अहिले लामो समयपछि यहाँ आउदा आनन्दसँग गाडीमै सवार हुन पाउँदा खुसी लागेको छ । सर्वसाधारणको जीवनशैलीसमेत फेरिएको रहेछ,’ उनले भने ।

जाजरकोटको पश्चिम भेगमा भोकविरुद्ध सहायता अभियान कार्यक्रम लिएर खाद्यान्न हस्तान्तरण गर्न पुगेका पत्रकार, नागरिक अगुवा तथा अधिकारकर्मीहरुले गाडीमै सामग्री लिएर ठाउँठाउँमा पुग्दा विकासले गति लिएको भन्दै खुसी व्यक्त गरे । सहायता अभियान तथा डिसहोमका प्रतिनिधि वसन्तप्रसाद शर्माले अब पश्चिम जाजरकोट पनि दूरीका हिसाबले टाढा नभएको बताए ।

मानिसको जीवनशैली बदलिएको उनले पाए । भन्छन्, ‘अब उत्पादन र रोजगारीमा जोड दिए समृद्धिको बाटो धेरै पर छैन ।’ बाहिरबाट आवश्यक सामग्री लिएर आएका गाडीलाई गाउँबाट अब स्थानीय उत्पादनका सामग्री पठाएर आर्थिक लाभ लिनुपर्ने शर्माको सुझाव छ ।

अहिले जाजरकोटमा वन तथा वातावरणमन्त्री एवं प्रतिनिधिसभा सदस्य शक्तिबहादुर बस्नेतको पहलमा वडावनमा १३२ केभी प्रसारणलाइनको सबस्टेसनको काम चालू अवस्थामा छ । यहाँका कच्ची सडक कालेपत्रेका लागि प्रक्रिया अघि बढेका छन् । त्यस्तै स्थानीय सरकार मूल सडकलाई गाउँगाउँमा जोडेर सबै वडा यातायातको पहुँचमा पु‑याउने अभियानमा छन् । छेडागाड नगरपालिका प्रमुख लालबहादुर महतारा गाउँगाउँमा सडक सञ्जाल विस्तारको काम तीव्र बनेको बताउँछन् । ‘हामीले आफ्नो गाउँ र टोललाई विकासको मूल प्रवाहमा ल्याउन इमानदारी र आफ्नोपन देखाउनुपर्ने छ । हामीले गर्ने काम आफ्ना लागि र भावी सन्ततीका लागि हो भन्ने कुरा गहिरो रूपमा बुझ्न जरुरी छ,’ उनले सगर्व भने ।

शिवालय गाउँपालिकाले सबै वडामा सडक निर्माण कार्यलाई तीव्रता दिएको छ । पालिकाको बढी बजेट सडक निर्माणमा लगाएको गाउँपालिकाका अध्यक्ष नरेन्द्रकुमार शाहीले बताए । नयाँ सडक निर्माण गर्दा ठाउँठाउँमा भत्किएको भए पनि अर्को वर्षदेखि सडकहरु लयमा आउने उनको विश्वास छ ।

जुनिचाँदे गाउँपालिकाले पनि सडक निर्माणलाई नै जोड दिएको छ । अहिले पालिकाको तल्लो भागमा सडक निर्माण कार्य तीव्र रूपमा भइरहेको कार्यबाहक अध्यक्ष शिवा आचार्य (बस्नेत)को भनाइ छ ।

जाजरकोटमा मध्यपहाडी लोकमार्गको कामलाई पनि तीव्ररूपमा अगाडि बढाइएको छ । छेडा–चाँदे सडक हुँदै जुम्ला सडक खण्डसमेत पश्चिम जाजरकोटमै पर्छ । कच्ची कटान कार्य तीव्र रूपमा भएको तर कच्ची काटेर वषौँ बितेको सडकमा कालोपत्रेको कामसमेत अगाडि बढाउन स्थानीयबासीको माग छ ।

अहिलेको वर्षायाममा निर्माणाधीन अवस्थामा रहेका सडकहरुलाई क्षति पु‑याउँदा केही समस्या देखिएको स्थानीय तहले जानकारी दिएका छन् । वर्षायाममा खोलाहरुमा पुल निर्माण नभएका कारण केही अवरोध आए पनि कच्ची कटान भएका सडकहरुले यात्रामा राम्रो सहयोग गरेको जुनिचाँदे गाउँपालिकाका सर्वसाधारण बताउँछन् ।

ठूला पुल पश्चिमको मुख्य अवरोध

यो सडकखण्डमा मोर्क खोला र खाराखोलामा पुल नहुँदा सर्वसाधारणले निकै सास्ती पाइरहेका छन् । मोर्क खोलामा आठ वर्षदेखि पुल निर्माण कार्य रोकिएको छ भने खारामा पुल निर्माण कार्य सुरु नै गरिएको छैन ।

छिन्चु–जाजरकोट सडकखण्डको छेडाबजारदेखि शिवालय १ सालतरासम्म कालोपत्रेको काम सम्पन्न भएको छ । मोर्कदेखि शिवालय गाउँपालिकाभित्रको सडकमा चार किलोमिटर कालोपत्रे गरिएको छ । बाँकी यो आर्थिक वर्षमा हुने बताइएको छ । (रासस)

प्रकाशित समय १३:४० बजे