नेपाली कांग्रेस केन्द्रीय नीति, अनुसन्धान तथा प्रशिक्षण प्रतिष्ठानले महाधिवेशन प्रतिनिधिहरुलाई प्रशिक्षण दिने क्रम निरन्तर चलाइरहेको छ । कोभिड–१९ को कारण भर्चुअल माध्यमद्वारा प्रशिक्षण कार्यक्रमहरु भइरहेका छन् ।

यही भदौं २९ गते प्रदेश १ का चार जिल्लाहरु ताप्लेजुङ, पाँचथर, इलाम र झापा, ३० गते प्रदेश २ का बारा, पर्सा, रौतहट तथा ३१ गते सिरहा र सप्तरीका सदस्यहरुलाई प्रशिक्षण दिइएको थियो । प्रविधिको असहजतालाई समेत सहज गराउँदै पार्टीका केन्द्रीय सदस्यहरु, संघीय तथा प्रदेश सांसदहरु, भातृ तथा शुभेच्छुक संस्थाका सदस्यहरु तथा विभिन्न तहका नेताहरु तथा सदस्यहरुको सहभागिता रहेको थियो ।

प्रमुख आतिथ्यता गर्दै केन्द्रीय उपसभापति तथा प्रतिष्ठानका प्रमुख विमलेन्द्र निधिले पानसमा वत्ती वालेर कार्यक्रमको उद्घाटन गरेका थिए । निधिले नेपाली कांग्रेसको आदर्श र सिद्धान्तको आधार राष्ट्रियता, लोकतन्त्र र समाजवादमा केन्द्रित रही परिवर्तन र संविधान निर्माणको नेतृत्व नेपाली कांग्रेसले नै गरेको हुनाले परिवर्तनबाट प्राप्त गणतन्त्र, संघीयता, समावेशीता, समानुपातिक निर्वाचन प्रणाली र धर्मनिरपेक्षता जस्ता उपलव्धिहरुको स्वामित्व कांग्रेसले नै लिनुपर्ने बताउदै अहिंसा र शान्तिपूर्ण मार्गको माध्यमद्वारा आगामी दिनमा देशको विकास गर्नुपर्ने बताए ।

नेपाली कांग्रेसले उल्लिखित विचार र उपलब्धिका आधारमा देशव्यापी प्रशिक्षण र संगठन सुदृढीकरण गर्नुपर्नेमा जोड दिँदै निधिले विचारमा एकता हुनासाथ पार्टीमा स्वतः एकता रहने विश्वास व्यक्त गरे । सबै दिनका कार्यक्रमहरु दुई सत्रमा सञ्चालित थिए । पहिलो दिन नेपाली कांग्रेसका आमन्त्रित केन्द्रीय सदस्यहरू गोपालकुमार बस्नेत र सुधीरकुमार शिवाकोटीको अध्यक्षतामा, दोस्रो दिन केन्द्रीय सदस्य फरमुल्लाह मंसूर र पूर्व केन्द्रीय सदस्य सुरेन्द्रप्रसाद चौधरी, तेस्रो दिन सप्तरीका सभापति दिनेश यादव र जितेन्द्र देवको सभापतित्वमा कार्यक्रम सम्पन्न भएका थिए ।

पहिलो दिनको कार्यक्रममा पूर्व महामन्त्री कृष्णप्रसाद सिटौला, केन्द्रीय सदस्य भीष्मराज आङ्देम्वे, पार्टीका प्रवक्ता एवं सूचना, संचार तथा प्रचार विभाग प्रमुख विश्वप्रकाश शर्मा, केन्द्रीय सदस्यहरु— केशवकुमार वुढाथोकी र सरिता प्रसाई, पूर्वमन्त्री केशव थापा, झापाका उपसभापति राम कट्टेल, पाँचथरका उपसभापति मित्र काफ्ले र प्रतिष्ठान सदस्य कान्ता रिजालले मन्तव्य व्यक्त गरेका थिए । दोस्रो दिनको कार्यक्रममा केन्द्रीय सदस्यहरु अजय चौरसिया र राधेचन्द्र यादव,, श्रीकृष्णदेव यादव, शान्ती कार्की, देवेन्द्र नेपाली, पर्सा जिल्ला सभापति अजयकुमार द्विवेदी, पूर्व सांसद अनिल रुंगटा, जयकिरण, शम्भुहजारा पासवान् र प्रतिष्ठान सदस्य मधु शाहीले सम्बोधन गरेका थिए ।

तेस्रो दिनको कार्यक्रममा समाजवादी चिन्तक एवं केन्द्रीय सदस्य प्रदीप गिरीको विशेष प्रशिक्षण मन्तव्य थियो । केन्द्रीय सदस्य चित्रलेखा यादव, डा. गणेश मण्डल, हेमराज तातेड, अमीय कुमार यादव, रामचन्द्र यादव, नसीर सिद्दिकी सहितका वक्ताहरुको मन्तव्य रह्यो । कार्यक्रमको अन्त्यमा सहभागीहरुले प्रस्तुत विषयमाथि छलफल गरिएको प्रवक्ता विश्वप्रकाश शर्माले बताए ।

तीन दिनकै कार्यक्रममा प्रशिक्षणको आवश्यकताबारे प्रतिष्ठानका कार्यकारी निर्देशक प्रा. पुरुषोत्तम दाहाल, पार्टीको विधानबारे प्रशिक्षण निर्देशक खिलानाथ दाहाल र वर्तमान सरकारको कार्य समीक्षा प्रतिष्ठानका सदस्य राजु नेपालले प्रस्तुत गरेका थिए । अन्तिम दिनको कार्यक्रममा योजना आयोगका पूर्व उपाध्यक्ष तथा प्रतिष्ठानका सदस्य डा. गोविन्द पोख्रेलले समाजवाद र आजको नेपालको आर्थिक अवस्थावारे प्रशिक्षण दिएको उनले बताए ।

प्रकाशित समय १७:५६ बजे