राष्ट्रियसभा सदस्य वामदेव गौतमको नियुक्ति बदर गर्न तथा उनलाई मन्त्री नबनाउन अन्तरिम आदेशको माग गर्दै सर्वोच्च अदालतमा दायर भएको मुद्दाको सुनुवाई बुधबार भइरहेको छ ।

केही दिनअघि मात्र राष्ट्रिय सभामा मनोनित भएका सत्तारूढ दल नेपाल कम्युनिष्ट पार्टी (नेकपा)का उपाध्यक्ष गाैतमका विरूद्ध परेकाे रिटउपर न्यायाधीश आनन्दमोहन भट्टराईको इजलासमा सुनुवाई भइरहेको हो ।

अधिवक्ता दिनेश त्रिपाठीले आइतबार पेश गरेको उक्त रिट निवेदनलाई सर्वोच्च प्रशासनले सोमबार दर्ता गरेको थियो । निवेदनमा गौतमलाई सांसदको हैसियतमा काम कारबाही गर्न रोक लगाउनसमेत माग गरिएको छ । राष्ट्रियसभामा सरकारबाट कस्ता व्यक्ति मनोनित गर्ने भन्ने विषयमा प्रष्ट मापदण्ड जारी गर्नसमेत अधिवक्ता त्रिपाठीले रिटमा माग गरेका छन् ।

मन्त्रिपरिषदको सिफारिसमा गौतमलाई असोज १ गते राष्ट्रपति विद्यादेवी भण्डारीले नेपालको संविधानको धारा ८६ (२) को खण्ड ‘ख’ बमोजिम राष्ट्रियसभा सदस्यमा मनोनित गरेकी थिइन् ।

प्रकाशित समय १३:१० बजे