कोरोना भाइरसको महामारीको बीचमा पनि यही असोज १६ गतेबाट डिसहोम सिनेमा घरबाट नेपाली चलचित्र ‘शिरफूल’ प्रर्दशन हुने भएको छ । नाइस मिडिया नेटवर्क प्रालिको ब्यानरमा निर्माण भएको ‘शिरफूल’को निर्देशन कमल एक्चै मगरले गरेका छन् ।

नारी प्रधानमा यस चलचित्रमा आधुनिकताको बढ्दो प्रभावलाई मुख्य विषय बनाइएको छ । चलचित्रले युवा पुस्तामा देखिएको पश्चिमी संस्कृतिको प्रभावलाई समेटेको छ । चलचित्रमा रुपा राना, विनिता मगर, राज थापा, देव आले मगर, पूजा गदाल, नीता पुन, नविना तामाङ, विना थापा, लिला गुरुङ, मरिस्का पोखरेल लगायतका कलाकारहरुले अभिनय गरेका छन् । अभिनेत्री रुपा रानाबाहेक अधिकांश थियटरका कलाकरको यस चलचित्रमा अभिनय देख्न सकिन्छ ।

कोरोना महामारीले सबै क्षेत्र प्रभावित भएरहेको बेला ‘शिरफूल’ निर्माण युनिट वैकल्पिक माध्यमबाट चलचित्र प्रदर्शन गर्ने निर्णयमा पुगेको हो । दर्शकले डिसहोम सिनेमा घर, च्यानल नम्बर १०८ बाट दैनिक ८ सो हेर्न सकिने निर्माण टिमले जनाएको छ । जसअन्तर्गत बिहान १, ४, ७ र १० बजे हेर्न सकिनेछ भने दिउँसो १, ४ र बेलुका ७ तथा राति १० बजे हेर्न सकिनेछ ।

चलचित्रमा हरि लम्सालको संगीत, डिपी खनाल र सन्दीप थापाको गीत रहेको छ । ‘शिरफूल’लाई सिद्धान्त एस. पौडेलले निर्माण नियन्त्रण गरेका हुन् । यो चलचित्र कमलको डेब्यु निर्देशन रहेको छ भने यसै चलचित्रबाट लोकगायिका निता पुन र गायक देव आले मगरले अभिनयमा डेब्यु गर्दैछन् । ‘शिरफूलको छायाँकन काठमाडौँसहित तनहुँ, पोखरा, र सोलुखुम्बुको विभिन्न स्थानमा गरिएको हो ।

प्रकाशित समय १५:०९ बजे