विगत केही समययता भारतका विभिन्न राज्यमा फैलिएको बर्डफ्लु नेपालमा समेत भित्रिएको पुष्टि भएको छ । पशु सेवा विभागका अनुसार काठमाडौंको तारकेश्वर नगरपालिका वडा नं ७, साङ्लेखोला, फुटुङमा बर्डफ्लु संक्रमण पुष्टि भएको हो ।

बर्डफ्लु संक्रमण पुष्टि हुनासाथै पशु सेवा विभागका प्राविधिकहरूले शनिबार २ हजार ५४४ हाँस, कुखुरा, टर्की र बट्टाई नष्ट गरेका छन् ।

विभागका अनुसार फुटुङका स्थानीय कृषकले पालेका टर्की र हाँसको नमुना केन्द्रीय पशुपन्छी रोग अन्वेषणशालामा शुक्रबार रियल टाइम पीसीआर विधिबाट परीक्षण गर्दा बर्डफ्लु (एचफाइभएनएट) पुष्टि भएको हो ।

बर्डफ्लु पुष्टि भएपछि शनिबार नै त्यस क्षेत्रका १ हजार ८६५ हाँस, ६२२ बट्टाई, ३२ कुखुरा, २५ टर्की, ५४२ अण्डा र ७५ केजी दाना नष्ट गरिएको विभागले जनाएको छ ।

विभागले कुनै पनि पन्छी फार्म वा अन्य पन्छीपालन अथवा बिक्री स्थलमा अस्वाभिक रूपमा पन्छी बिमारी  परेमा वा मरेमा तत्काल नजिकको पशु सेवाका निकायमा सूचित गर्न सबैमा आग्रह गरेको छ ।

प्रकाशित समय १७:३९ बजे