म्याग्दीको धौलागिरि गाउँपालिका-४, जेल्तुङस्थित म्याग्दी नदीमाथि झोलुंगे पुल बनेपछि एक दिनको बाटो एक घण्टामा छोटिएको छ । एक सय दुर्इ मिटर लामो झोलुंगे पुल निर्माण भएपछि भौगोलिक रुपमा विकट र दुर्गम क्षेत्रमा पर्ने सिम्कोष र बगर गाउँका बासिन्दाले जोखिम मोलेर तुइन र साँघुको भरमा हिँड्दै अाएको एक दिनको घुमाउरो बाटो एक घण्टामा छोटिएको हो ।

२०७४ साउनमा म्याग्दी नदीमा आएको बाढीले काठको झोलुंगे पुल बगाएपछि सिस्कोषका बासिन्दाले तुइनबाट खाद्यान्न, नुनतेल तारेर उपभोग गर्दै आएका थिए । सिम्कोषकी ज्योति थापाले पुल बनेपछि दैनिक जीवनयापन धेरै सहज भएको बताइन् ।

गत वर्ष सिम्कोषको जंगलमा चरनका लागि बगरका बासिन्दाले लगेका गाईबस्तु पुल बनेपछि मात्रै गाउँमा ल्याएका छन् । ४४ लाख ७६ हजार १८८ को लागतमा निर्माण भएको पुलबाट ३७ घरधुरीका २२३ जनसंख्या लाभान्वित भएका उपभोक्ता समितिका अध्यक्ष नरप्रसाद पुनले जानकारी दिए । २०७४ फागुन ८ गतेदेखि निमार्ण सुरु भएको पुल २०७५ जेठ अन्तिम साता सम्पन्न भएको थियो । स्थानीयवासीले ५० दिनका दरले श्रमदान गरेका थिए ।

पुल निर्माणसँगै विकट सिम्कोष बगरका बासिन्दा र धौलागिरि चक्रीय पदमार्गको भ्रमणमा आउने पर्यटकलार्इ सहज भएको छ भने स्थानीयले बालिनाली र जडिबुटी उत्पादन बढाउन सक्ने भएका छन् । म्याग्दीमा यो वर्षमात्र ११ वटा झोलुंगे पुल निर्माण भएका छन् ।

सन्तोष गौतम (रासस)

प्रकाशित समय १०:३३ बजे