नेत्रविक्रम चन्द नेतृत्वको नेपाल कम्युनिस्ट पार्टीका प्रवक्ता खड्गबहादुर विश्वकर्मा ‘प्रकाण्ड’ले वर्तमान सरकारका कारण मुलुक संकटमा फसेको आरोप लगाएका छन् । पार्टी स्थापनाको पाँच वर्ष पुगेको अवसरमा राजधानीमा आयोजित कार्यक्रममा नेता प्रकाण्डले सरकारविरुद्ध लाग्न कार्यकर्तालाई आह्वान गरे । ‘राष्ट्रियता संकटमा छ । देश नै रहन्छ कि रहँदैन चिन्ता छ । हिमाल, तराई र पहाडलाई अलग बनाउने खेल भइरहेको छ । राष्ट्रघाती कदम नसच्याउने हो भने नेपाली जनता स्वाधीनताका लागि राष्ट्रिय सेनामा बदलिनेछन्,’ उनले भने ।

नेकपा कम्युनिस्ट पार्टी नेकपाका अध्यक्ष पुष्पकमल दाहाल ‘प्रचण्ड’ र गृहमन्त्री रामबहादुर थापा ‘बादल’लाई प्रकाण्डले ‘गद्धार’को संज्ञा दिए । ‘प्रचण्ड, बादल गद्धार हुन्, उनीहरुकै कारण जनताले धोका पाएका छन्,’ उनले भने । नेताहरुले धोका नदिएको भए नेपाली जनताको आफ्नै सत्ता हुने उनको जिकिर थियो ।

वर्तमान सरकारलाई राष्ट्रघातीको संज्ञा दिँदै प्रकाण्डले केपी शर्मा ओलीको नेतृत्वमा सरकार बनेपछि राष्ट्रघाती प्रोजेक्ट अघि बढाउन थालिएको बताए । उपल्लो कर्णाली जलविद्युत आयोजनामा भारतीय पक्षको संलग्नता संकेत गर्दै उनले त्यसलाई आफूहरुले रोकेको दाबी गरे । तर, अहिलेको सरकारले त्यसपछि अरु ‘राष्ट्रघाती प्रोजेक्ट’ अघि बढाउँदै गरेको उनले बताए । नेकपा माओवादी केन्द्रलाई नेकपा एमालेसँग पार्टी एकता गरेर विजयनिकट पुगेको सर्वहारा वर्गको क्रान्तिमाथि प्रचण्डले षड्यन्त्र गरेको उनको आरोप छ ।

शान्तिवाटिकामा गर्ने भनिएको कार्यक्रम नेकपाले शनिबार भृकुटीमण्डपमा गरेको छ । पाँचौं पुनर्गठन दिवसको अवसर पारेर नेकपाले राजधानीमा ‘शक्ति प्रदर्शन’ समेत गरेको छ । नेकपाले भृकुटीमण्डपस्थित प्रदर्शनीमार्गलाई दुईतर्फी बन्द गरी ‘विशाल जनसभा’ गरेको हो । सभामा उक्त पार्टीका प्रवक्ता खड्गबहादुर विश्वकर्मालगायतले सम्बोधन गरे । पार्टीका महासचिव नेत्रविक्रम चन्द विप्लव भने सहभागी भएनन् ।

सभा व्यवस्थापनका लागि हँसिया हथौडा अंकित रातो पोसाकमा कार्यकर्ता खटिएका थिए । सभाका लागि तीन स्थानबाट जुलुस निस्किएको थियो । जुलुसका कारण शनिबार दिउँसो कतिपय ठाउँमा यातायात सञ्चालनमा समेत अवरोध हुँदा यात्रुले सास्ती पाए । सभाका लागि देशका विभिन्न स्थानबाट करिब एक लाख जनता तथा कार्यकर्ता काठमाडौं आएको नेकपाको दाबी छ । सहभागीले भने सभास्थलमा ५० हजारजतिको उपस्थिति रहेको अनुमान गरेका छन् ।

प्रकाशित समय १७:४९ बजे