नेपालले टी–ट्वान्टी अन्तर्राष्ट्रिय सिरिजअन्तर्गत आज घरेलु टोली यूएईसँग दोस्रो खेल खेल्दैछ ।

तीन खेलको सिरिज अन्तर्गत दोस्रो खेलमा आज नेपाल युएई भिड्न लागेका हुन् । खेल आईसीसी क्रिकेट एकेडेमीको मैदानमा नेपाली समयअनुसार दिउँसो २ बजेर ४५ मिनेटमा सुरु हुनेछ । पहिलो खेलमा यूएईसँग पराजित भएको नेपाललाई सिरिज जोगाउन आजको खेल जित्नै पर्ने दबाव छ ।

यसअघि हिजो भएको पहिलो खेलमा नेपाल युएईसँग २१ रनले पराजित भएको थियो । शीर्षक्रमको ब्याटिङ नचल्दा नेपालले खेल गुमाउन पुगेका थियो । पहिलो ओभरको पहिलो बलमै नेपालले प्रदीप ऐरीलाई गुमाएको थियो । दोस्रो विकेटका लागि कप्तान पारस खड्का र ज्ञानेन्द्र मल्लले ३१ रनको साझेदारी गरे पनि मल्ल पाँचौ ओभरको अन्तिम बलमा ७ रनमा पेभिलिएन फर्किए ।

छैटौं ओभरको तेस्रो बलमा दिपेन्द्रसिंह ऐरी ४ रनमा आउट भए । आठौं ओभरको पाँचौ बलमा कप्तान पारस खड्का २५ रनमा आउट भएपछि नेपालको इनिङ धर्मराएको थियो । १० औं ओभरको पाँचौ बलमा रोहित कुमार पौडेल ४ रनमा आउट भए । सन्दीप जोरा र करण केसीले ३३ रनको साझेदारी गरे । १४ औं ओभरको अन्तिम बलमा करण केसी पनि व्यक्तिगत ४ रनमा आउट भएका थिए । सन्दीपले ४६ बलमा ३ चौका र १ छक्का प्रहार गर्दै ५३ रन बनाए । त्यस्तै सोमपाल कामीले १९ बलमा १ चौका र १ छक्कासहित १९ रन जोडे पनि नेपाललको हार टार्न सकेनन् ।

यूएईले निर्धारित २० ओभरमा ६ विकेटको क्षतिमा १ सय ५३ रन बनाएको थियो । नेपालका लागि सन्दीप लामिछानेले ४ ओभरमा २५ रन खर्चेर २ विकेट लिए । वसन्त रेग्मीले २ विकेट लिँदा सोमपाल कामी र अभिनाश बोहोराले १–१ विकेट हात पारेका थिए ।

सन्दीप जोराको नयाँ रेकर्ड
नेपाल पराजित भए पनि क्रिकेटर सन्दीप जोराले टी–२० अन्तर्रा्ष्ट्रिय क्रिकेटमा अर्धशतक हान्ने सबैभन्दा कम उमेरका खेलाडी बनेका छन् । १७ वर्ष १०३ दिनको उमेरमा युएईविरुद्धको डेब्यू खेलमा उनले अविजित ५३ रन बनाए ।

यसअघि उक्त कीर्तिमान क्यानडाका हिरल पटेलको नाममा थियो । हिरलले २०१० मा १८ वर्ष १ सय ७७ दिनको उमेरमा आयरल्यान्डविरुद्ध अर्धशतक बनाएका थिए । जोराले उत्कृष्ट ब्याटिङ गर्दै ४६ बलमा ३ चौका र १ छक्काको मद्धतमा अविजित ५३ रन बनाएका हुन् ।

तीन खेलको एकदिवसीय अन्तर्राष्ट्रिय सिरिजमा यूएईलाई २–१ ले पराजित गरेको नेपाल टी–ट्वान्टी क्रिकेट सिरिजमा भने १–० ले पछि परेको छ । सिरिज जोगाउन नेपाललाई आजको खेल जित्नै पर्ने दबाव छ ।

प्रकाशित समय ०८:५४ बजे