प्रमुख प्रतिपक्षी नेपाली कांग्रेसले संसदीय सुनुवाइ समितिको बैठक बहिष्कार गरेको छ । कांग्रेस सांसदहरुले संवैधानिक आयोगमा गरिएको सिफारिसप्रति लिखित असहमति राख्दै सुनुवाइ समितिको बैठक बहिष्कार गरेका हुन् । माघ ६ गते सिफारिस भएका विभिन्न पाँच संवैधानिक आयोगका प्रमुखमाथि उजुरी आह्वान गर्ने विषयमा छलफल गर्न आइतबार सुनुवाइ समितिको बैठक बोलाइएको थियो ।

कांग्रेसले प्रमुख प्रतिपक्षी दलका नेता शेरबहादुर देउवाको उपस्थितिबिनै बसेको बैठक गैरकानुनी भएको भन्दै आपत्तिसमेत जनाएको छ । बैठकमा सुरु भएलगत्तै कांग्रेस सांसद ज्ञानेन्द्रबहादुर कार्कीले प्रमुख प्रतिपक्षी दलको नेताको सहभागिताबिना भएको निर्णय अमान्य हुने बताए ।

सभापति लक्ष्मणलाल कर्णले भने १० दिनको समय दिएर उजुरी आह्वान गर्ने र त्यसबीचमा छलफल गर्न सकिने बताए । त्यसलगत्तै कांग्रेस सांसदहरु कार्की, जितेन्द्र देव र पुष्पा भुसाल लिखित असहमति बुझाएर बैठकबाट बाहिरिएका हुन् ।

परिषद्ले राष्ट्रिय प्राकृतिक स्रोत तथा वित्त आयोगको अध्यक्षमा बालानन्द पौडेल, राष्ट्रिय समावेशी आयोगको अध्यक्षमा शान्तराज सुवेदी र मधेसी आयोगको अध्यक्षमा विजयकुमार दत्तलाई सिफारिस गरेको थियो । त्यस्तै, थारु आयोगको अध्यक्षमा विष्णुकुमार चौधरी र मुस्लिम आयोगको अध्यक्षमा समिम अन्सारीको नाम सिफारिस गरिएको छ ।

कांग्रेसका तर्फबाट सुनवाइ समिति सदस्य भीमसेनदास प्रधानले आफूहरुले असहमति जाहेर गरेका थिए । ‘संविधानविपरीत आयोगका अध्यक्षहरुको नाम सिफारिस भएकाले लिखित असहमति जनाएका छौं,’  प्रधानले न्युज कारोबारसँग भने, ‘त्यसमा असहमति जनाउँदै हामी प्रक्रियाबाट बाहिरिएका छौं । प्रस्तावित अध्यक्षहरुको सुनवाइ प्रक्रियामा हामी सहभागी हुँदैनौं ।’

प्रकाशित समय १३:२६ बजे