सत्तारुढ संघीय समाजवादी फोरम नेपालले प्रतिनिधिसभा सदस्य हरिनारायणप्रसाद रौनियार (पप्पु)को निलम्बन फुकुवा गर्न माग गर्दै सभामुख कृष्णबहादुर महरालाई ज्ञापन पत्र बुझाएको छ । पर्सा क्षेत्र नम्बर ३ बाट जितेका पार्टीका सांसद रौनियारलाई संविधान र प्रतिनिधिसभा नियमावलीविपरीत निलम्बन गरिएको तत्काल फुकुवा गर्न माग गर्दै बुधबार फोरमले सभामुख महरालाई ज्ञापनपत्र बुझाएको हो ।

निलम्वन संविधान र प्रतिनिधिसभा नियमवलीविपरीत रहेकाले तत्काल फुकुवा गरी संसदीय गतिविधिमा सहभागी गराउन माग गर्दै सभामुखलाई ज्ञापनपत्र बुझाइएको संसदीय समाजवादी फोरमका महासचिव रामसहायप्रसाद यादवले जानकारी दिए । ‘पार्टीको माघ १८ गते बसेको संसदीय दलको बैठकले संविधान र प्रतिनिधिसभा नियमावलीविपरीत रौनियारलाई निलम्बन गरेको ठहर गर्दै तत्काल फुकुवा गर्न सभामुखलाई ज्ञापन पत्र बुझाउने निर्णय गरेको थियो । सोही निर्णयअनुसार पार्टीले सभामुखको ध्यानाकर्षण गराएको हो,’ महासचिव यादवले न्युज कारोबारसँग भने ।

फोरमको ज्ञापनपत्रपछि सभामुख महराले सो विषयमा कानुन, न्याय तथा संसदीय मामिलामन्त्री भानुभक्त ढकालसँग पनि छलफल गरेका छन् । सांसद रौनियार प्रमुख रहेको पप्पु कन्सट्रक्सन प्रालि कालोसूचीमा परेपछि संघीय संसद सचिवालयले गत १९ असोजमा उनलाई निलम्बन गरेको थियो ।

प्रकाशित समय १९:१२ बजे