सरकारले रोप्नुअघि नै धानको समर्थन मूल्य तोकेको छ । कृषि मन्त्रालयको सिफारिस र उद्योग वाणिज्य तथा आपूर्ति मन्त्रालयको प्रस्तावमा मन्त्रिपरिषदको मंगलबार साँझ बसेको बैठकले धानको समर्थन मूल्य तोकेको हो ।

मध्यम धानको मूल्य प्रतिक्विन्टल २ हजार ८८५ रुपैयाँ र मोटा धानको मूल्य २ हजार ७३५ तोकिएको छ । मन्त्रालयका अनुसार खेतीको सबै लागत खर्चमा २० प्रतिशत नाफा र १० प्रतिशत ढुवानी भाडा जोडेर मूल्य तोकिएको हो । नेपालमा बाली लगाउनुअघि धानको न्यूनतम समर्थन मूल्य तोकिएको पहिलोपटक हो ।

‘संरक्षित कृषि, सुनिश्चित बचत’ अन्तर्गत बाली लगाउनुअघि नै समर्थन मूल्य तोक्ने कृषि तथा पशुपन्छीमन्त्री घनश्याम भुसालले बताएका थिए । उनले किसानलाई निश्चित बचत ग्यारेन्टी हुनेगरी मुख्य बालीको न्यूनतम समर्थन मूल्य तोक्ने र बजारमा बिक्री नभए सरकारले खरिद गर्ने व्यवस्था गरेर कृषिलाई संरक्षित र किसानलाई नाफा हुने वातावरण बनाउने बताउँदै आएका थिए । अन्य मुख्य बालीको पनि खेतीअघि नै न्यूनतम समर्थन मूल्य तोकिने मन्त्रालयले जनाएको छ ।

प्रकाशित समय १३:०६ बजे