युनिटेक हाइड्रोपावर कम्पनीले निर्माण गर्न लागेको माथिल्लो फावाखोला जलविद्युत आयोजनामा माछापुच्छ्रे बैंकको अगुवाइमा तीन वित्तीय संस्थाले लगानी गरेका छन् । आयोजामा माछापुच्छ्रे बैंकको अगुवाइमा गुह्येश्वरी मर्चेन्ट बैंकिङ एन्ड फाइनान्स र आइसिएफसी फाइनान्सले ८० करोड लगानी गरेका हुन् ।

राजधानीमा बिहीबार एक कार्यक्रम गरी तीन वित्तीय संस्था र प्रवर्धक कम्पनी युनिटेकका प्रतिनिधिबीच लगानीसम्बन्धी सम्झौतामा हस्ताक्षर भएको छ । सम्झौतापत्रमा वित्तीय संस्थाका तर्फबाट माछापुच्छ्रे बैंकका प्रमुख कार्यकारी अधिकृत (सिइओ) सुमन शर्मा र कम्पनीका तर्फबाट युनिटेकका अध्यक्ष नरेन्द्र मैनालीले हस्ताक्षर गरेका छन् । आयोजनामा माछापुच्छ्रे बैंकको ४० तथा गुह्येश्वरी र आइसिएफसीको २०/२० करोड लगानी रहनेछ ।

बाँकी ४४ करोड ५ लाख रकम भने सेयरधनीको तर्फबाट लगानी हुनेछ । कम्पनीको कुल लागत १ अर्ब २५ करोड ५ लाख रुपैयाँ छ । ५.८ मेगावाट क्षमताको माथिल्लो फावाखोला ताप्लेजुङको सिरिजंगा र पाथिभरा याङवरक गाउँपालिकामा पर्छ ।

आयोजनामा २६ सय लिटर प्रतिसेकेन्ड पानीको बहावव फर्काएर करिब ४.५ किलोमिटर लामो पाइममार्फत २७१ मिटरको हेड माथिबाट खसालेर सतही पावर हाउस रहने गरी निर्माण संरचना तयार गरिने कम्पनीले जनाएको छ । विद्युत गृहमा दुईवटा पेल्टन टर्वाइन जडान हुनेछन् ।

उत्पादित बिजुली आठ किमी लामो ३३ केभीको प्रसारणलाइनबाट पाँचथरको अमरपुरमा रहेको नेपाल विद्युत प्राधिकरणको १३२ केभी काबेली सबस्टेसनको राष्ट्रिय प्रसारणलाइनमा जोडिनेछ ।

आयोजनामा ताप्लेजुङ तथा झापाका व्यवसायी, डाक्टर, इन्जिनियरलगायत प्रवासी नेपालीको पनि लगानी छ । आयोजनाअन्तर्गत हाल ७ किलोमिटर सडक निर्माण, ११ केभी कन्सट्रक्सन पावर लाइन र जग्गा खरिद सम्पन्न भइ हेडवर्क्स, पाइप लाइन र ३३ केभी प्रसारणलाइन निर्माण भइरहेको प्रवर्धक कम्पनी युनिटेकका अध्यक्ष मैनालीले जानकारी दिए । आयोजनाबाट २०७८ साउन १६ गतेभित्र बिजुली उत्पादन गरी राष्ट्रिय प्रसारणमा जोड्ने लक्ष्य लिइएको छ ।

लगानी सम्झौतासम्बन्धी हस्ताक्षर कार्यक्रममा वित्तीय कम्पनीको नेतृत्वकर्ताको तर्फबाट माछापुच्छ्रे बैंकका सिइओ शर्माले समयमै आयोजना सम्पन्न गर्ने गरी काम अघि बढाउन आग्रह गरे । ‘समयमै काम सम्पन्न भएमा सबैलाई लाभ हुनेछ र खर्च पनि बढ्दैन,’ उनले भने, ‘यसतर्फ विशेष ध्यान दिन म आग्रह गर्छु ।’

प्रकाशित समय २१:११ बजे