काठमाडौँ महानगरपालिकाले प्रदेश तथा संघीय सरकारसँगको समन्वयमा आगामी आर्थिक वर्षमा महानगर ज्येष्ठ नागरिक अस्पताल निर्माण गर्ने योजना बनाएको छ । महानगरपालिकाको आव २०७६/७७ को नीति तथा कार्यक्रम प्रस्तुत गर्दै नगरप्रमुख विद्यासुन्दर शाक्यले वृद्धावस्थामा हुने रोगको समयमै निदान तथा उपचार गर्ने सुविधा सम्पन्न अस्पताल निर्माणको महानगरले योजना बनाएको बताए ।

महानगरपालिकाले स्वास्थ्यसँगै यातायात र सामाजिक सुरक्षाका क्षेत्रमा पनि ज्येष्ठ नागरिकलाई सम्मान र सुविधा दिने कार्यक्रम प्रस्ताव गरेको छ । पूर्वप्रधानमन्त्री मनमोहन अधिकारीको स्मृतिमा ‘मनमोहन ज्येष्ठ नागरिक सम्मान कार्यक्रम’ सञ्चालन गरेर नेपाल सरकारले उपलब्ध गराउने सामाजिक सुरक्षा भत्ता घरघरमै उपलब्ध गराउने अभ्यासलाई निरन्तरता दिइने उनले बताए ।

त्यस्तै ७५ वर्ष उमेर पुगेका महिला र ८० पुगेका पुरुषलाई महानगरपालिकाले ‘महानगर विशेष भत्ता’ का रुपमा थप १२ हजार उपलब्ध गराउने भएको छ । उनले भने, ‘महानगरले ज्येष्ठ नागरिकलाई वरिष्ठ चिकित्सकद्वारा घरघरमा स्वास्थ्य जाँच र साझा बसमा निःशुल्क यात्रा गर्ने व्यवस्था मिलाइएको छ ।’

निमोनिया तथा अन्य संक्रमणको रोकथामका लागि ‘मनमोहन अधिकारी ज्येष्ठ नागरिक निःशुल्क खोप कार्यक्रम’ सञ्चालन गरिने प्रमुख शाक्यले बताए । नेपाली कांगेसका नेता गणेशमान सिंहले प्रजातन्त्र प्राप्तिका लागि गरेको योगदानलाई दिगो बनाउन हरेक वर्ष ‘गणेशमान सिंह सेनानी सम्मान’ बाट विभुषित गर्ने महानगरको कार्यक्रम छ ।

आगामी आवमा महानगरले संयुक्त आवास निर्माण गर्दा ९० प्रतिशतसम्म छुट दिने नीति लिएको प्रमुख शाक्यले बताए । दुई वा दुईभन्दा बढी जग्गाधनीको सहमतिमा एउटै आवासीय भवन निर्माण गरेर नक्सा पास गरेमा सो छुट दिइनेछ । नेपाली मौलिकता झल्कने कलात्मक घरलाई थप प्रोत्साहन गर्न कार्यविधि बनाइ लागू गरिनेछ । भित्री सहरमा रहेका पुराना भवनको जोखिम न्यूनीकरणका लागि सुविधा सम्पन्न एकीकृत मौलिक बस्ती विकास गर्ने नीति लिइनेछ ।

‘स्थानीय घरधनीको सहमति र प्रत्यक्ष सहभागितामा नमुना आवास क्षेत्रको विकास गर्ने कार्यक्रम सञ्चालन गरिनेछ,’ उनले भने । ‘नो मास्क सिटी’ का रुपमा विकास गर्न धुवाँधुलो नियन्त्रण गर्दै हाल प्रयोगमा ल्याइएका ब्रुमरलाई थप प्रभावकारी बनाउने र आवश्यकताअनुसार थप गरिने कामनपाले जनाएको छ । महानगरमा सञ्चालित ब्रुमरले उठाएको धुलोलाई प्रशोधन गरेर नयाँ वस्तु उत्पादन गर्न प्रोत्साहन गरिने नीति छ । प्रधानमन्त्री केपी शर्मा ओलीसँगै महानगरपालिका प्रमुख शाक्य चीन भ्रमणमा जाँदा महानगरसँग भगिनी सम्बन्ध रहेको छेन्दु नगरपालिकासँग भएको सहमतिअनुसार दुई ब्रमुर प्राप्त भइसकेको छ । महानगरले आफैँले थप दुई ब्रुमर खरिद प्रक्रिया अघि बढाएको जनाएको छ ।

फोहरमैलाको अन्तिम व्यवस्थापनमा प्रभावकारिता हासिल गर्न आधुनिक प्रविधिको उपयोग गरिने प्रमुख शाक्यले बताए । कुहिने फोहर पुनः प्रयोग गर्न कम्पोस्ट प्लान्ट र बायो ग्यास प्लान्ट स्थापना गरिनेछ । प्रदूषण नियन्त्रणका लागि काठमाडौँ उपत्यकाभित्र आउने सवारी साधनबाट हुने धुलो प्रदूषणलाई नियन्त्रण गर्न नाकामा सम्बन्धित तहसँग समन्वय गरेर आधुनिक ‘भेहिकल क्लिनिङ सेन्टर’ निर्माण गर्ने महानगरपालिकाको योजना छ ।

महानगरपालिकाले निश्चित स्थानमा ‘सवारी निषेधित क्षेत्र’ घोषणा गर्ने, थप स्थानमा स्मार्ट पार्किङ लागू गर्ने, ‘भर्टिकल पार्किङ र अन्डरग्राउन्ड पार्किङ’ निर्माण गर्ने योजना बनाएको छ । काठमाडौँ महानगरपालिका सवारी तथा यातायात व्यवस्थापन ऐन, २०७५ कार्यान्वयन गर्ने प्रमुख शाक्यले जानकारी दिए । गत वर्षबाटै सुरु भएको ‘मेयर उज्यालो कार्यक्रम’ अन्तर्गत सडक बत्तीको निर्माण गरिनेछ ।

महानगरले महानगरस्तरीय एकीकृत सीप विकास प्रतिष्ठान सञ्चालनमा ल्याउन आवश्यक अध्ययन गरिरहेको जनाएको छ । युवाहरुलाई स्वदेशी उद्यममा आकर्षित गर्न स्वदेशी वस्तुको उत्पादन, प्रवर्धन र बजारीकरणमा प्रोत्साहन गरिनेछ । सेवामूलक उद्योगलाई प्रश्रय र प्रोत्साहन गर्ने नीति लिइनेछ ।

महानगरपालिकालाई सफा, सुन्दर, सुरक्षित र जीवन्त सहरका रुपमा अघि बढाइने प्रमुख शाक्यले बताए । महानगरवासीको आवश्यकता र चाहनालाई आत्मसात् गर्दै हरेक वर्ष महानगरले नयाँ अभियान सञ्चालन गरिरहेको उनले जानकारी दिए । उनले भने, ‘आगामी वर्ष सम्पदा संरक्षण तथा संवर्धन र पर्यटक प्रवर्धनका लागि पूर्वाधार विकास वर्षका रुपमा अभियान सञ्चालन हुनेछ ।’ महानगरपालिकाले आगामी आर्थिक वर्षको बजेट १० गते सार्वजनिक गर्दैछ । (रासस)

प्रकाशित समय २१:३२ बजे