पोखराको विजयपुर खोलामा अस्थायी रुपमा सञ्चालनमा ल्याइएको डाइभर्सन पुल बाढीले बगाएपछि पोखरामा मालबाहक सवारी साधनको लाइन लागेको छ । बाढीले गए आइतबार राति डाइभर्सन बगाएपछि १० टन भारवहन क्षमताका गाडी मोटरेबल पुलबाट गुड्न नपाएपछि पोखरासम्म लाम लागेका हुन् । गण्डकी प्रदेशको राजधानी पोखरा प्रवेशको मुख्यद्वार विजयपुर खोलामाथि अस्थायी रूपमा करिब ३ महिनाअघि डाइभर्सन सञ्चालनमा ल्याइएको थियो ।

मालबाहक गाडीका मजदुरले पिउने पानीदेखि खाना र दिशापिसाब फेर्नसमेत समस्या भएको गुनासो गरेका छन् । सर्लाहीबाट ह्युम पाइप बोकेर मुस्ताङ जाँदै गरेका अरुणकुमार थारु, पोखरा विमानस्थलका लागि सिमेन्ट ल्याएका सहदेव थापालगायतले सोमबार खाना खान र दिशा पिसाब गर्न पनि कठिन भएको बताए । सिहंले बिहानको खानाको रुपमा स्थानीय एक पसलमा चाउमिन खाएको गुनासो गरे । समयमै स्थायी पुल बन्न नसक्दा पटक–पटक डाइभर्सन पुलमा पानीको बहाव बढ्न साथ रोकिनुपर्ने भएकाले आफूहरुले धेरै समस्या खेप्नुपरिरहेको चालक रामनिवास सिंहले बताए । डाइर्भसन बाढीले बगाउँदा पोखरा हुँदै स्याङ्जा, पर्वत, बागलुङ, म्याग्दी, मुस्ताङलगायतका जिल्लामा जाने करिब २०० मालबाहक ट्रकको लाइन गगनगौडमा लागेको छ ।

पृथ्वी राजमार्गमा पर्ने विजयपुरको पुलको विकल्पमा बेलिब्रिज समयमै निर्माण हुन नसक्दा समय–समयमा समस्या हुने गरेको छ । मालबााहक सामान बोकेका गाडी पोखरा भित्रिने एकमात्र विजयपुरको डाइभर्सन बगाएपछि पोखरा विमानस्थलको निर्माण कार्य नै प्रभावित हुने चिनियाँ सीएएमसी कम्पनीका जनसम्पर्क अधिकृत कृष्णप्रसाद चापागाईले बताए । राष्ट्रिय गौरवको आयोजना पोखरा विमानस्थलको निर्माण कार्यले तीव्रता पाएका बेला विभिन्न संचरनाको फाउन्डेसन निर्माण तथा स्टिल संरचना निर्माणको क्रममा चीनबाट आउँदै गरेका करिब ४० वटा गाडी बाटोमै रोकिएको उनले बताए । विमानस्थल प्रशासन सोमबारबाटै डाइभर्सन निर्माणमा जुटेको छ ।

डिभिजन सडक कार्यालय पोखराका प्रमुख हरि पोखरेलले हालै अस्थायी रुपमा निर्माण गरेको विजयपुरको डाइभर्सन खोलाले बगाएकोले पुनः डाइभर्सन बनाउन ३–४ दिन लाग्ने बताए । ‘मंगलबार बिहानैदेखि डाइभर्सनको काम सुरु गर्छौं, मौसमले साथ दिए ४ दिनभित्रमा अस्थायी पुल (डाइभर्सन) बनाउन सक्छौं,’ उनले भने ।

डाइभर्सन खोलाले बगाएर केही ह्युम पाइप करिब एक सय मिटरभन्दा तलसम्म पु-याएको प्रहरीले जनाएको छ । जोखिमलाई मध्यनजर गरी विजयपुर खोलाको डाइभर्सन हुँदै जाने १० टनभन्दा धेरै भारवहनका सवारी साधनलाई गगनगौडामै रोकेको प्रहरी सहायक निरीक्षक तीर्थराज पौडेलले जानकारी दिए ।

बेलिब्रिज निर्माणको काम अन्तिम चरणमा पुगेको ठेकेदार कम्पनीका उद्धव राईले बताए । जाली बुन्दै बीचमा आरसिसि ढलान गर्नुपर्ने भएकाले निर्माणको काममा केही ढिलाइ भएको उनले जानकारी गराए । वैशाख २४ गते एक महिनामा उक्त पुल निर्माण सक्ने गरी सम्झौता भए पनि प्राविधिक रुपमा एक महिनामा नसकिने दाबी गर्दैै उनले साउन पहिलो सातासम्म लाग्ने तर्क गरेका छन् । करिब दुई करोड ३० लाखको लागतमा उक्त पुल निर्माण हुन लागेको होे । सब–इन्जिनियर किरण सुवेदीले बेलिब्रिजको काम ढिलो भएकाले डाइभर्सन बनाउनुपरेको बताए ।

प्रकाशित समय ०६:५८ बजे