चालू आर्थिक वर्षको पाँच महिनामा ४२ लाख ८९ हजार ७३८ किलो मासु तथा माछा नेपाल भित्रिएको छ । भन्सार विभागका अनुसार चालू आवको आयात विवरणमा पाँच महिनामा ८५ करोड ५६ लाख मूल्यबराबरको मासु, माछा, घुँगीलगायत आयात भएको हो ।

नेपालमा पर्याप्त सम्भावना भएका मासुजन्य कृषि उपज पनि उत्पादन गर्न नसक्दा बर्सेनि करोडौं बाहिरिन गरेको छ । बजार व्यवस्थापन तथा भण्डारण समस्यालगायतका कारण कृषिप्रति युवा आकर्षण घटेपछि मुलुकको उत्पादन घटेको छ ।

नेपाल माछा तथा मासु उत्पादनका लागि उर्वर भूमि हो । तर, उत्पादनका लागि सरकारी नीति तथा बढ्दो युवा पलायनको प्रत्यक्ष प्रभाव उत्पादनमा परिरहेको छ । जसका कारण नेपालमै उत्पादन हुनसक्ने खाद्यवस्तु र कृषि उपजका लागि पनि बर्सेनि अर्बौं विदेशिने गरेको हो । फतलः नेपालीले विदेशमा कमाएको पैसा खाद्यान्न आयातमा उतै जाने गरेको छ ।

नेपालमा भारत, फ्रान्स, इटली, नेदरल्याण्डस्, थाइल्याण्ड, चीन, अष्ट्रेलिया, नर्वे, भियतनाम, बंगलादेश, सिङ्गापुर र जापान गरी १२ देशबाट अष्ट्रिच, टर्की, हाँस, बंगुरर, भेडा, कुखुरा, माछा तथा समुद्रमा पाइने विभिन्न जीवका तयारी मासु आयात हुने गर्छ ।

आयात २३ प्रतिशत वृद्धि

भन्सार विभागका अनुसार नेपालमा निर्यातको तुलनामा आयात २३ प्रतिशतले बढेको छ । चालू आवको ५ महिनामा ११.२ प्रतिशत निर्यात वृद्धि हुँदा आयात ३४.०२ दुई प्रतिशतले बढेको हो । चालू आर्थिक वर्षको पाँच महिनामा ६ खर्ब ७ अर्बको वस्तु तथा सेवा आयात भएको छ भने ३७ अर्ब ५० करोडको निर्यात भएको विभागको तथ्यांकमा उल्लेख छ ।

प्रकाशित समय ०८:०० बजे