नेपाल पूर्वाधार विकास बैँकले हालसम्मकै उच्च रकमको प्राथमिक सेयर (आईपीओ) जारी गर्ने भएको छ । कम्पनीले ८ अर्ब रुपैयाँबराबरको आईपीओ निष्कासनका लागि नेपाल धितोपत्र बोर्डबाट अनुमति पाएको हो ।

बैँकले प्रतिकित्ता १०० रुपैयाँ दरका ८ करोड कित्ता सेयर निष्कासनका लागि आवेदन दिएकोमा बोर्डले शुक्रबार अनुमति दिएको छ । आईपीओ निष्कासन तथा बिक्री प्रबन्धकको काम एनआईबीएल एस क्यापिटलले गर्नेछ ।

ठूला पूर्वाधार र अन्य क्षेत्रमा ठूलो लगानी जुटाउन सरकारले २०७५ फागुनमा पूर्वाधार विकास बैँकको स्थापना गरेको हो । यातायात, ठूला पुल, सडक, विमानस्थलगायतका पूर्वाधारका क्षेत्रसहित कृषि, ऊर्जा, पर्यटन, सहरी पूर्वाधारजस्ता ठूला लगानीका क्षेत्रमा कम्पनीले लगानी गर्नेछ ।

बैँकको अधिकृत पुँजी ४० अर्ब छ भने २० अर्ब जारी पुँजी र १२ अर्ब चुक्ता पुँजी छ । सार्वजनिक निजी-साझेदारी मोडलमा स्थापना भएको यो बैँकमा सरकारको १० प्रतिशत र सर्वसाधारणको ४० प्रतिशत लगानी हुनेछ । त्यस्तै वाणिज्य बैँकहरूको २०.८९ प्रतिशत, बिमा कम्पनीको १८.९७ प्रतिशत, सार्वजनिक कम्पनीको ५.१५ प्रतिशत र निजी कम्पनीको ४.९९ प्रतिशत सेयर रहनेछ ।

प्रकाशित समय १२:५४ बजे