देशका विभिन्न प्रयोगशालामा गरिएको पीसीआर परीक्षणबाट पछिल्लो २४ घन्टाभित्र ३ सय ८० जनामा कोरोना संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ ।

मन्त्रालयका प्रवक्ता डा.जागेश्वर गौतमले पछिल्लो २४ घन्टामा थपिएकासहित देशभर संक्रमितको संख्या २२ हजार ९ सय ७२ पुगेको जानकारी दिए । उनका अनुसार हाल नेपालमा ६ हजार ५ सय ४४ जना सक्रिय संक्रमित रहेका छन् ।

संक्रमितमध्ये १६ हजार ३ सय ५३ जना उपचारपछि घर फर्किएका छन् । गत २४ घण्टाभित्र ४०  जना संक्रमित उपचारपछि कोरोनामुक्त भएर अस्पतालबाट डिस्चार्ज भएका छन् । यस अवधिमा ८ हजार ५ सय १५ जनाको पीसीआर परीक्षण गरिएकाे मन्त्रालयले जनाएकाे छ ।

हाल देशभर ११ हजार ३८ जना क्वारेन्टिनमा रहेका छन् । ७५ जनाको कोरोना संक्रमणबाट ज्यान गइसकेको छ ।

काठमाडौं उपत्यकामा पनि बढ्दै

आइतबार काठमाडौं उपत्यकाभित्र थप ९२  जनामा संक्रमण पुष्टि भएको छ ।  काठमाडौंमा ९० र ललितपुरमा २ जना संक्रमित थपिएको प्रवक्ता गाैतमले जानकारी दिए । योसँगै उपत्यकामा कोरोना संक्रमितको संख्या ११ सय ३६ पुगेको छ ।

अहिलेसम्म काठमाडौंमा ९ सय १२, ललितपुरमा १ सय ३९ र भक्तपुरमा ८५ जनामा संक्रमण पुष्टि भएको मन्त्रालयले जनाएको छ ।

प्रकाशित समय १६:२८ बजे