नोवेल कोरोनाभाइरस (कोभिड १९) बाट नेपालमा पाँच दिनमै २२ सय मानिस संक्रमित भएका छन् भने २० जनाको मृत्यु भएको छ । स्वास्थ्य तथा जनसंख्या मन्त्रालयका अनुसार शनिबारदेखि बुधबारसम्म दुई हजार २१८ जना संक्रमित थपिएका हुन् ।

शनिबार ३७८, आइतबार ३८०, सोमबार ३३८, मंगलबार ६३८ र बुधबार ४८४ नयाँ संक्रमित थपिएको मन्त्रालयका प्रवक्ता डा. जागेश्वर गौतमले जानकारी दिए ।

यस्तै पाँच दिनमै २० जनाले कोरोना संक्रमणबाट ज्यान गुमाएका छन् । शनिबार ३, आइतबार २, सोमबार ४, मंगलबार ३ र बुधबार ८ जनाको ज्यान गएको हो । हालसम्म पर्सामा सबैभन्दा धेरै १९ जनाले ज्यान गुमाएका छन् । त्यस्तै काठमाडौं र धनुषामा ८/८ र मोरङमा ६ जनाको कोरोनाबाट ज्यान गएको छ । यो अवधिमा ९१४ जना कोरोनामुक्त भई घर फर्किएको स्वास्थ्य मन्त्रालयले जनाएको छ ।

नेपालमा हालसम्म २४ हजार ४३२ जना संक्रमित फेला परेका छन् भने १६ हजार ७२८ जना डिस्चार्ज भएका छन् । यो कुल संक्रमितको ६८.४७ प्रतिशत हो । मन्त्रालयको तथ्यांकअनुसार हालसम्म रौतहटमा सबैभन्दा धेरै १ हजार ६१७, कैलालीमा १ हजार २८०, पर्सामा १ हजार २१८, काठमाडौंमा १ हजार १६६ र महोत्तरीमा ९८५ संक्रमित भेटिएका छन् ।

त्यस्तै हालसम्म कोरोनाबाट ९१ जनाले ज्यान गुमाएका छन् । मन्त्रालयको तथ्यांकअनुसार यो ०.५४ प्रतिशत हो । त्यस्तै देशभर सक्रिय संक्रमितको संख्या ७ हजार ६१३ छ । मन्त्रालयका अनुसार देशभर हाल १४ हजार ८४६ जना क्वारेन्टिनमा छन् ।

प्रकाशित समय ११:४६ बजे