झापाको बिर्तामोडस्थित बी एन्ड सी मेडिकल कलेज शिक्षण अस्पतालले आगामी दुई वर्षभित्र मुटु प्रत्यारोपण गर्ने गरी तयारी गरेको छ । हाल प्रदेश १ का मुटुका बिरामी उपचारका लागि काठमाडौँ तथा भारतको दिल्ली र भेलोर जानुपर्ने अवस्थालाई अन्त्य गर्न अस्पतालले सो तयारी थालेको हो ।

यसका लागि अस्पतालले चिकित्सक, पूर्वाधार तथा उपकरणसहित आन्तरिक तयारी द्रुत रुपमा अगाडि बढाएको अस्पतालका कार्यकारी निर्देशक दुर्गाप्रसाद प्रसाईंले जानकारी दिए । अस्पतालले तीन वर्षदेखि विशेषज्ञ चिकित्सकसँगको समन्वयमा मुटुसम्बन्धी गुणस्तरीय सेवा सञ्चालन गर्दै आएको छ । उनले भने, ‘अब अस्पतालले मुटु प्रत्यारोपणको योजना अघि सारेको छ । यो कार्य चुनौतीपूर्ण भए पनि हामी सफलता हासिल गर्छौं ।’

हालै मात्र अस्पतालले मुटु रोगको सम्पूर्ण उपचारका लागि अत्याधुनिक क्याथल्याब सेवा सञ्चालनमा ल्याएको छ ।  करिव ५० करोड रुपैयाँको लगानीमा प्रदेश १ मा पहिलोपटक सो सेवा सञ्चालनमा ल्याइएको जनाइएको छ । कार्यकारी निर्देशक प्रसाईलें सस्तो र गुणस्तरीय सेवा चिकित्सकीय सेवा दिन अस्पताल प्रतिबद्ध रहेको बताए ।

हाल क्याथल्याव सेवाबाट ६ जना बिरामीको उपचार हुँदै आएको अस्पतालका वरिष्ठ मुटुरोग विशेषज्ञ डा. उमेश यादवले जानकारी दिए । अस्पतालको उपचार सेवा नेपालकै उच्च प्रविधियुक्त र सुविधासम्पन्न भएको उनको दाबी छ ।

स्वदेश र विदेशका समेत मुटुरोगका विशेषज्ञ चिकित्सकको लामो अनुभवको सेवा अब बी एन्ड सीबाट उपलब्ध हुने अस्पतालका जनसम्पर्क अधिकृत प्रमिश गिरीले बताए । तीन सय शय्याको सो अस्ततालले गत वर्षदेखि प्रदेश १ मै पहिलो पटक क्यान्सर उपचार सेवा सुरु गरेको छ ।

अस्पतालले मिर्गाौला रोगीका लागि उपचार तथा डायलाइसिस सेवासमेत प्रदान गर्दै आएको छ । अस्पतालले कोरोनाभाइरसका बिरामीलाई समेत उत्कृष्ट सेवा प्रदान गर्दै आएको अधिकृत गिरीले बताए । (रासस)

प्रकाशित समय १९:१० बजे