हाँस्यव्यंग्यकार मनोज गजुरेलसँग सम्बन्ध विच्छेद गरेपछि मीना ढकाल यतिखेर छुट्टै संसारमा रमाउन चाहिरहेकी छन् । दुईवटा गीत गाइन्, पहिलोमा लाइकभन्दा डिस्लाइक बढी आयो तर हार मानिनन् । दोस्रो गीत अलि धेरैले मन पराए । अहिले उनी फिल्म निर्माणको तयारीमा छन् । डिभोर्सपछि कलाकारितामा रमाउने प्रयास गरिरहेकी मीनासँग न्युजकारोबारका लागि सुरज घिमिरेले गरेको कुराकानी :

के गर्दै हुनुहुन्छ हिजोआज ?
अँ, मेरा दैनिक कामहरु भइरहेका छन् । बिहान ५–६ बजे उठ्छु, एक्ससाइज गर्छु, चियानास्ता गर्छु, त्यसपछि नानीलाई स्कुल पुर्याउँछु । अनि पसल खोल्छु । भेटघाट हुन्छ, मिटिङ हुन्छ । त्यस्तै–त्यस्तै काम हुन्छ ।

दुईवटा गीत ल्याउनुभयो, सम्मान कत्तिको पाउनुभा’छ ?
मेरो पेरिफेरिमा रहनुहुने सबैले माया गर्नुहुन्छ । विशेषतः लेडिजहरु, जो नेपालबाहिर हुनुहुन्छ, जस्ले आफूले मातृभूमिमा केही गर्न सक्नुभएन, उहाँहरुका आफ्नै बाध्यता थिए, उहाँहरुले एकदमै सपोर्ट गर्नुहुन्छ । उहाँहरुले मलाई भन्नुहुन्छ– तपाईंको साथमा हामी छौं, कसैसँग नडराउनुस् । उहाँहरुले मलाई बारम्बार कल गरिराख्नुहुन्छ । उहाँहरुप्रति एकदमै आभारी छु ।

श्रोताका लागि नयाँ के ल्याउँदै हुनुहुन्छ ?
अहिले तीजको गीत सुटिङ गर्दै छु । असारको दोस्रो सातासम्ममा यहाँहरुले पाउनुहुन्छ । अब विस्तारै राजनीति पनि गर्नुपर्छ । समाज सेवातिर पनि मेरो इच्छा छ ।

फिल्म बनाउने कुरा सार्वजनिक गर्नुभएको छ, कस्तो फिल्म बनाउनुहुन्छ ?
अँ, त्यो चैं हाम्रो अहिलेको कन्सेप्ट हो । अहिलेको नेपाली चलचित्र अलिक फरक धारको बनाउने कि भन्ने सोच छ । साथी आरएन शर्माले एउटा स्टोरी लेख्दै हुनुहुन्छ । स्टोरी चैं नारीप्रधान, ‘लभ स्टोरी त यस्तो पो हुनुपर्छ त !’ भन्ने खालको फिल्म बनाउने तयारी छ ।

कति सफल भएको महसुस गर्नुहुन्छ ?
सफलता केलाई मान्ने ? घर, गाडी, बंगला…, एकदमै धेरै धन–सम्पत्ति नै सफलताका सूचक हुन् त ? के यी सबै भएको मान्छे खुसी छन् त ? केलाई सफलता मान्ने ?

कस्तो कलाकार मान्नुहुन्छ आफूलाई ?
म कलाकार हैन । मलाई कलाकार नभन्नु होला । यो मेरो बच्चादेखिकै नाच्ने–गाउने सौख हो । त्यसलाई मैले मूर्तरुप दिएको मात्र हुँ । त्यसैले मलाई कलाकारसँग नदाँज्नुहोला । मैले रहर पूरा गर्न एउटा भिडियो निकालेकी हुँ । मरो प्रोफेसन गायन, कलाकारिता भएको भए म आफूलाई कलाकार भन्ने थिएँ ।

अहिले जे गरिरहनुभएको छ, त्यो कसैलाई देखाउन पनि हो कि !
म कसैलाई देखाउने कुरामा विश्वास गर्दिन । मलाई मेरो इनबक्समा आएर साथीहरुले भन्नुहुन्छ– केही गर्नुस्, यो समाजलाई केही गरेर देखाउनुस्, नडराउनुस् । तर, म डराएकै छैन, मैले कसैलाई देखाउन गर्न खोजेकै हैन, कसैलाई देखाउनु नै छैन । अरुलाई देखाउन थाल्यो भने त आफैं पछि परिन्छ । आफ्नो खुसी र सन्तुष्टिको लागि गर्ने हो । आफ्नो सम्मानको लागि हो । मैले मनोजजीको सपोर्ट गर्ने दर्शक पनि देखाउन खोजेको हैन । मनोजजीलाई पनि देखाउन खोजेको हैन । मलाई थाहा छ– म कति गर्न सक्छु, के गर्न सक्छु । मेरो क्षमता, मेरो हैसियत मलाई राम्ररी थाहा छ । जब म परिवारको बन्धनबाट केही गर्न निस्किएँ, तब मैले सबै देखिसकेको छ । कोही एकजनालाई भने देखाउनुछ, त्यो अहिले भन्दिन ।

अब अलि व्यक्तिगत कुरातर्फ जाऔं । सम्बन्धविच्छेद सहमतिमै भएको हो ?
सहमति जस्तै हो । त्यो बाध्यताले निम्त्याएको सहमति हो । सहमति भएको भए पहिले नै गर्नुपथ्र्यो तर उहाँ (मनोजजी)ले सेफ ल्यान्डिङ चाहनुभयो ।

डिभोर्सपछि मनोजजीसँग सम्पर्क छ ?
छैन । डिभोर्स हुनुभन्दा पहिला नै म चुनावका लागि विराटनगर गएको थिएँ । मैले त्यहीँ के–के कुरा सुनेँ । उहाँले बुवाममीलाई सुनाउनुहुँदोरहेछ । डिभोर्सको कुरा गर्नुहुँदोरहेछ । त्यतिकै फोन–फोनमै झगडा भएपछि मैले उहाँको फोन–फेसबुक सबै ब्लक गरेँ । त्यसपछि छैन । तर, डिभोर्स त मेरो धेरै पहिला, १०–१५ वर्ष पहिलादेखिकै प्रस्ताव हो । तर, उहाँले स्वीकार गर्नुभएको थिएन ।

राम्रो केटा पायो भने बिहे गर्छु भन्दैहुनुन्छ रे !
अँ, राम्रो केटा पायो भने आफूसँग भावना मिल्ने, मुख्य कुरा त अब एउटा अन्डरस्ट्यान्डिङ हुनुपर्यो । म के गर्न चाहन्छु, मलाई जहाँसम्म लाग्छ, हामी जतिको मान्छेले बुझिसकेको पनि छौँ । मैले राम्रो भन्नुको अर्थ अनुहार राम्रो भनेको होइन, पैसावाला भन्न खोजेको होइन । अन्डरस्ट्यान्डिङ हुनुपर्यो, मैले के गर्न चाहेको छु, सपोर्ट गर्नुप¥यो । त्यही नै हो । अहिले नै बिहे गर्ने मेरो समय होइन । बिहेका लागि ढोका खुला राखेकोमात्र हो । केही गर्छु भनेर निस्किएपछि केही गर्नैपर्छ । बिहे २–४ वर्ष लाग्छ । कम्तीमा पनि दुई वर्ष ।

अन्त्यमा, के भन्नुहुन्छ ?
सबैले मलाई देखिरहनुभएको छ, बुझ्नु नि भएको छ । म सधैँ दर्शकसँग अपडेटमै रहन्छु । मलाई मेरो कमी–कमजोरीको विषयमा कमेन्ट तथा सल्लाह–सुझाव दिनु नै हुनेछ । मलाई सधैँ हौसला तथा साथ दिनुहुने सबैलाई धन्यवाद दिन चाहन्छु । सधैँ साथ, सहयोग गर्नुहुन्छ भन्ने आशा र विश्वास छ ।

प्रकाशित समय १८:३२ बजे