केवल समय मात्र

यतिबेला सूत्रबद्ध छ

छैनन् मत्स्यगन्धा जस्ता

कुनै सत्यवतीहरू

कोही हुन सकेनन्

कृष्णद्वैपायनको पराशर

ऊर्मी तिमी नै हौ

जगत कि ईश्वरीय ऋचा

ज्ञान, विज्ञान र तत्त्वदर्शी कि त्रिवेणी

शाश्वत सत्य नै हो

बन्दैनन् ऋषिबिनाका ऋचाहरू

जन्मदैनन् ऊर्मी बिनाका व्यास र बुद्ध

ऊर्मी तिमी नै हौ

सृष्टिको सूत्रबद्ध रचना

म लेखाउन सक्दिन

स्वनाम धन्य विद्वानहरुबाट

वेद र अठार पुराण

मलाई उनान्तिसौं व्यास चाहिएको छ

छैटौं बुद्ध चाहिएको छ

मेरी प्रिय ऊर्मी

के तिमी मलाई दिन सक्छ्यौ

यो कल्पमा एउटा अर्को व्यास र बुद्ध ?

ऊर्मी म तिमीबाट

दीक्षित हुन चाहन्छु

तिम्रै गर्भमा छन्

वाङ्ममय स्वरुप

म यो कल्पको पराशर भएर

उपहार दिन चाहन्छु

ज्ञान पुञ्जहरू

ब्रह्मसूत्रले युक्त बनाएर

तिमीबाटै जन्माउन चाहन्छु

दुई मेधावी सन्तान ।

(ऋषभदेव घिमिरे, गोदावरी)

हाल : संयुक्त राज्य अमेरिका

प्रकाशित समय १४:०३ बजे