आजकालका बिहानीहरु पहिलेझैँ हतारका, व्यस्तताका,

थोरबहुत विवशताका

कतै कुदिरहेका, कतै गएर सकिनका निम्ति आतुर देखिनन्

मानौं कि समय पनि सत्याग्रहमा लागेको

आन्दोलनकर्ताझैँ

मौन, स्तब्ध

एकटक, एकैठाउँमा अडिक छ

आफ्नै जियाद्रो अडान लिएर ।

ऊ तलको चौतारीको घुम्ती

मोडहरुले

मानौं कि मोडहरुले मोडिन बिर्सिसके

एकछिन त लाग्छ,

ती मोड, घुम्तीहरु अनि तीसँग जोडिएका यावत्

उतारचढावहरु,

वर्षौंअघिका इतिहास नै पो बन्छन् कि ।

भनिन्छ नि

घाम हुनेसँग जून हुँदैन

जून हुनेसँग घाम हुँदैन

होइन,

न जून न घाम भएका के हुन्छ

फगत

भ्रम मात्र

अनाहकको, अफसोचको अनि

पराजयको

भ्रम मात्र ।

आशा छ,

मौन समयले दम तोडेको दिन

नयाँ दिन हुनेछ

भरोसा, विश्वास अनि

यकिनको नयाँ अध्याय कोरिनेछ

किनकि हामीलाई थाहा छ

यो समय पनि बितेर जानेछ ।

प्रकाशित समय १२:०० बजे