ट्रकले बालिकालाई ठक्कर दिएर गम्भीर घाइते बनाएपछि तनावग्रस्त बनेको कोहलपुरमा स्थानीय प्रशासनले कर्फ्यू लगाएको छ । स्थिति नियन्त्रणमा लिन अनिश्चितकालीन कर्फ्यू आदेश जारी गरिएको बाँकेका सहायक सीडीओ कृष्णकान्त उपाध्यायले बताए ।

उनका अनुसार पूर्वतर्फ रोहीनी खोला, पश्चिमतर्फ किरण खोला, उत्तरतर्फ नौबस्ता र दक्षिणतर्फ बपिपरीचोकसम्म लागु हुनेगरी कर्फ्यू लगाइएको हो । आक्रोशित भीडले इलाका प्रहरी कार्यालय कोहलपुरको क्यान्टिनमा समेत तोडफोड गरेको छ ।

यसअघि भीडलाई नियन्त्रण गर्ने क्रममा प्रहरीले गोली चलाएपछि केही आन्दोलनकारी घाइते भएका छन् । प्रदर्शनकारीको ढुंगा लागेर डीएसपीसमेत घाइते भएकाे प्रहरीले जनाएकाे छ । दुवैतर्फका २४ जना घाइते भएको बताइएको छ ।

आइतबार बिहान ना २ ख ९४५९ नम्बरको ट्रकले ठक्कर दिँदा कोहलपुरकी १२ वर्षीया प्रकृति चन्द गम्भीर घाइते भएकी छन् । उनलाई उपचारका लागि काठमाडौँ पठाउने तयारी भइरहेको छ । आक्रोशित विद्यार्थीले ठक्कर दिने ट्रक जलाएका छन् ।

प्रकाशित समय १५:३६ बजे