पछिल्लो तथ्यांकअनुसार नेपालमा कोरोना संक्रमितको संख्या ३९ हजार नाघेको छ । गएको २४ घन्टाभित्र विभिन्न जिल्लामा महिला ३ सय ३ र पुरुष ५ सय ९६ गरी ८ सय ९९ जना संक्रमित थपिएका छन् । यस अवधिमा ११ हजार १२९ जनाको पीसीआर परीक्षण गरिएको थियो ।

अब देशभर संक्रमितको संख्या ३९ हजार ४ सय ६० पुगेको स्वास्थ्य तथा जनसंख्या मन्त्रालयले जनाएको छ । सोमबार थपिएकामध्ये काठमाडौं उपत्यकाका २ सय ९८ जना रहेको मन्त्रालयका प्रवक्ता डा. जागेश्वर गौतमले जानकारी दिए । जसमध्ये  काठमाडौंका १ सय ९० जना, भक्तपुरका ४१ जना र ललितपुरका ६७ जना रहेका छन् । हिजो उपत्यकामा ४ सय २९ जनामा कोरोना संक्रमण पुष्टि भएको थियो ।

यस्तै देशभर सक्रिय संक्रमितको संख्या १७ हजार ८ सय २२ रहेको छ । जसमा संस्थागत आइसोलेशनम १० हजार ७ सय १ जना रहेका छन् । होम आइसोलेशनमा ७ हजार १२१ जना रहेका छन् । पछिल्लो २४ घण्टामा ५८८ जना डिस्चार्ज भएको मन्त्रालयले उल्लेख गरेको छ । हालसम्म २१ हजार ४१० जना कोरोना संक्रमणबाट निको भएका छन् ।

नेपालमा पछिल्लो २४ घन्टाभित्र थप ७ जनाको कोरोना संक्रमणबाट मृत्यु भएको मन्त्रालयले जनाएको छ । योसँगै नेपालमा मृतक संख्या २ सय २८ पुगेको छ ।

प्रकाशित समय १६:२९ बजे