नेपाल कम्युनिस्ट पार्टी (नेकपा) को स्थायी कमिटी बैठक बालुवाटारमा सुरु भएको छ । नेकपा एमाले र माओवादी केन्द्र एकीकरणपछि गठन भएको नेकपाको यो पहिलो स्थायी कमिटी बैठक हो ।
नेकपाको स्थायी कमिटी ४५ सदस्यीय छ । स्थायी कमिटीमा तत्कालीन एमालेका पदाधिकारीसहित स्थायी कमिटी सदस्य तथा तत्कालीन माओवादी केन्द्रका केन्द्रीय कार्यालय कमिटीका सदस्य तथा अरु केही नेता सदस्य छन् ।
बैठकमा पार्टीको केन्द्रदेखि स्थानीयसम्मको संरचना विस्तारमा केन्द्रित रहेर अध्यक्षद्वय केपी शर्मा ओली र पुष्पकमल दाहाल ‘प्रचण्ड’ले सम्बोधन गर्नेछन् । त्यसपछि महासचिव विष्णु पौडेलले एकता प्रक्रियादेखि यसबीच भएका संगठनात्मक कामको विवरण प्रस्तुत गर्नेछन् । बैठकले पार्टी सञ्चालन नियमावली पारित गर्नेछ । स्थायी कमिटी सदस्यहरुलाई आवश्यक सुझावसहित बैठकमा उपस्थित हुन भनिएको छ ।
पार्टी सञ्चालन नियमावली पारितपछि केन्द्रीय कमिटीको बैठक बसेर अनुमोदन गर्ने स्थायी कमिटी सदस्य वेदुराम भुसालले बताए । विधान र नियमावली बनेपछि त्यसैलाई टेकेर तलका कमिटी एकीकरण गर्ने उनले बताए । ‘प्रतिवेदन पारितपछि प्रदेश कमिटी, जिल्ला किमिटीलगायतका कमिटी गठन गर्न बाटो खुल्नेछ,’ भुसालले भने ।
बैठकमा प्रधानमन्त्री तथा पार्टी अध्यक्ष ओलीको आसन्न चीन भ्रमणबारे पनि छलफल हुनेछ । स्थायी कमिटी बैठकअघि नौ सदस्यीय केन्द्रीय सचिवालयको बैठक बालुवाटारमै बसेको थियो ।

प्रकाशित समय १६:४४ बजे