चीनकोे वुहानबाट देखिएको कोरोना भाइरस निमोनिया (कोभिड १९) विश्वका ५० मुलुकमा देखिएपछि विश्वव्यापी चिन्ता सुरु भएको छ ।

यो भाइरसका कारण हालसम्म ८३ हजार ७२९ संक्रमित भइसकेका छन् भने २ हजार ८५९ को मृत्यु भइसकेको छ । कुल संक्रमितमध्ये ३६ हजार ७१२ जना उपचारपछि घर फर्केका छन् ।
कुल संक्रमितमध्ये करिब ८ हजारको अवस्था गम्भीर रहेको अन्तर्राष्ट्रिय समाचार संस्थाहरूले जनाएका छन् ।

उत्तर कोरिया र नाइजेरियामा समेत कोरोना भाइरसका संक्रमितहरू देखिएपछि यो भाइरस प्रभावित मुलुकहरूको संख्या ५० पुगेको हो ।

चीनपछि दक्षिण कोरियामा कोभिड–१९ संक्रमितहरू सर्वाधिक धेरै छन्, त्यहाँ हालसम्म २ हजार ३३२ जनामा यो भाइरस संक्रमण पुष्टि भइसकेको छ भने २६ जनाको मृत्यु भइसकेको छ ।
नेपालीहरूको आकर्षक रोजगार गन्तव्यका रूपमा रहेको कोरियामा एकै दिनमा यो भाइरस संक्रमितहरूको संख्या करिब ६ सयले वृद्धि भएको हो ।

विश्व स्वास्थ्य संगठन (डब्लूएचओ)ले विश्वका कुनै पनि मुलुक यो भाइरसको संक्रमणबाट बच्न नसक्ने भनेर चेतावनी दिइसकेको छ ।

हालसम्म ‘एक जनामात्र संक्रमित भएकोमा ऊ पनि निको भएर घर फर्किसर्किसकेको’ सरकारले प्रचार गर्दै आए पनि अवस्थाको गाम्भीर्यता बढ्न थालेपछि स्वास्थ्य सेवा विभागले यसविरुद्धको अभियान चलाउने निर्णय गरेको छ ।

विभागले अत्यावश्यकबाहेक कोरोना भाइरसविरुद्ध विभागअन्तर्गतका जनशक्ति परिचालन गरिएको बताएको छ ।

कोरोना महामारीबाट संक्रमित विमारी बढ्दै गए तिनको उपचार कहाँ कहाँ गर्ने भन्ने सरकारले अहिलेसम्म प्रष्ट जानकारी दिएको छैन । केही निजी अस्पतालहरूमा गत वर्षका सार्स संक्रमित उपचारमा प्रयोग गरिएका ‘आइसोलेसन कक्ष’लाई नै उपयाेग गर्ने रणनीतिमा सरकार छ ।

यस्तै, सम्भावित कोरोना प्रभावितहरूलाई राख्ने ‘क्वारेन्टाइन स्थल’ पनि सरकारले चयन गरेकै छैन । चीनको वुहानबाट ल्याइएका १८३ कोरोना प्रभावितहरूलाई अहिले भक्तपुरको खरिपाटीमा राखिएको छ ।

उनीहरूमा कोरोना संक्रमण नभएको पुष्टि भएपछि १४ दिनको ‘क्वारेन्टाइन’पछि आउँदो साता घर फिर्ता पठाउने सरकारको तयारी छ ।

यसैबीच, काठमाडौं उपत्यकामा विगत तीन सातादेखि मौसमी फ्लु फैलिएको छ । शुक्रराज ट्रपिकल तथा सरुवा रोग अस्पतालमा हङकङ फ्लु (एचथ्री), एन–१ एन१ (स्वाइन फ्लु)लगायत मौसमी फ्लुका बिमारीहरू उपचारका लागि जाने क्रम बढेको छ ।

गत वर्ष स्वाइन फ्लुका कारण केही नेपालीहरूका मृत्यु भए पनि ‘निमोनिया’भन्दै सूचना प्रवाह गरिएकाले यस्ता मौसमी फ्लुको प्रकोपबारे आमनागरिकले सही सूचना नै पाउन सकेनन् ।

हाल दैनिक एक दर्जनका हाराहारीमा माैसमी फ्लुबाट संक्रमितहरू उपचारका लागि आउने गरेको शु्क्रराज ट्रपिकल तथा सरुवा रोग अस्पतालले जनाएको छ । योभन्दा ठूलो संख्यामा माैसमी फ्लुबाट संक्रमितहरू निजी अस्पतालमा उपचारका लागि पुग्ने गरेका छन् ।

स्वास्थ्य सेवा विभागले अहिले कोरोना प्रकोपविरुद्धको अभियानमा सातै प्रदेशमा आवश्यक जनशक्ति खटाइने जनाएको छ ।

कति छन् प्रशिक्षित जनशक्ति?

स्वास्थ्य तथा जनसंख्या मन्त्रालयका अनुसार महामारी/प्रकोप तथा संक्रामक रोगहरूविरुद्धको तयारी तथा प्रतिकार्यमा खटिने गरी सरकारी र निजी क्षेत्रका ६७ जना चिकित्सकहरूलाई विशेष प्रशिक्षण दिइएको छ । यीमध्ये अधिकांश विशेषज्ञ चिकित्सक हुन् ।

यस्तै बिमारीको उचित व्यवस्थापनासम्बन्धी तालिम २२९ जनालाई दिइएको छ । यीमध्ये प्रदेश नं १ मा ३२, प्रदेश नं २ मा ३७, बागमतीमा ३८, गण्डकीमा ३१, प्रदेश ५ मा ३७, कर्णालीमा ३१ र सुदूरपश्चिममा २३ जना छन् । यो तालिम लिनेमा १२५ जना डाक्टरहरू हुन भने अन्य नर्सहरू हुन् ।

यसैगरी १०० जना प्रयोगशाला प्राविधिकहरूलाई संक्रामक रोग प्रयोगशाला नमुना संकलन तथा ढुवानीका लागि विशेष प्रशिक्षण दिइएको मन्त्रालयको स्वास्थ्य समन्वय महाशाखाले जनाएको छ ।

स्वास्थ्य सेवा विभागले यी सबै प्रशिक्षित जनशक्तिलाई जुनसुकै बेला परिचालन गर्न सकिने गरी सबै स्थानीय तहलाई उनीहरूको फोन नम्बरसहितको परिपत्र गरेको छ ।

प्रकाशित समय १६:४३ बजे