भारतमा एकजना युवाले मतदानका क्रममा आफूले भूलवस गलत पार्टीलाई मत हालेको थाहा भएपछि आफ्नो चोरऔँलो काटेर फालिदिएको बताएका छन् । उनका अनुसार उनले भूलवश उनले मन नपराएको भारतीय जनता पार्टीलाई भोट हालेका थिए । सामाजिक सञ्जालमा चर्चित भैरहेको एउटा भिडिओमा पवन कुमार नामका ती युवाले दूर्घटनावश सत्ताधारी भारतीय जनता पार्टीलाई मत हाल्न पुगेको बताएका छन् ।

एउटा क्षेत्रीय पार्टीलाई मत दिन चाहेका उनी विद्युतीय भोटिंग मशिनमा धेरै नै चुनाव चिन्हहरू देखेर अलमलमा परेको बताएका छन् । मतदान गरिसकेपछि प्रत्येक मतदाताको चोरऔंलामा सजिलै मेट्न नसकिने मसीको चिन्ह लगाइदिने गरिन्छ । भारतीय निर्वाचनको दोस्रो चरणमा ६१.१२ प्रतिशत मत खसेको बीबीसीले उल्लेख गरेको छ ।

पवन कुमारले बिहीवारको निर्वाचनमा भारतको उत्तर प्रदेश राज्यको बुलन्द शहर क्षेत्रमा मतदान गरेका थिए । भारतको आम निर्वाचनमा बिहीवार दोस्रो चरणको मतदान भएको थियो । ‘म हात्ती चुनाव चिन्हमा मतदान गर्न चाहन्थेँ, तर मैले झुक्किएर फूल चिन्हमा मत हालेँ, उनले भनेका छन् ।

सत्ताधारी भारतीय जनता पार्टीको चुनाव चिन्ह कमलको फूल हो भने, एउटा क्षेत्रीय शक्तिशाली पार्टी बहुजन समाज पार्टीको चुनाव चिन्ह हात्ती हो । उक्त पार्टीले अन्य दुई क्षेत्रीय पार्टीहरूसँग गठबन्धन गरेर भारतीय जनता पार्टीलाई चुनौति दिइरहेको छ ।

भारतको निर्वाचनमा पार्टीको चुनाव चिन्हको ठूलो अर्थ रहन्छ । धेरै भागमा साक्षरता दर कम रहेको उक्त देशमा चुनाव चिन्हका कारण पार्टी चिन्न मतदातालाई सहज हुने गर्छ ।भारतमा थुप्रै क्षेत्रीय पार्टी र गठबन्धनहरू पनि छन् जसले गर्दा मतदानका बेला मतदाता अन्योलमा पर्ने सम्भावना रहने गर्छ । पवन कुमार कथित दलित समुदायका सदस्य हुन् जुन समुदाय बहुजन समाज पार्टीको महत्त्वपूर्ण भोट बैंक मानिन्छ ।

प्रकाशित समय १५:५९ बजे