रुसका विपक्षी नेता एवं पुटिनका कट्टर आलोचक एलेक्सी नाभाल्नीलाई विषाक्त पदार्थ खुवाएर मार्ने प्रयास गरिएको सत्ता पक्षलाई आरोप लागेको छ । जर्मनीको बर्लिनस्थित अस्पतालले नाल्भानीलाई विषाक्त पदार्थ खुवाइएको बताएको हो ।

बर्लिनको च्यारिते हस्पिटलले जारी गरेको वक्तव्यमा उनलाई विषाक्त पदार्थ खुवाइएको देखिएको उल्लेख छ । रुसमा नाल्भानीको उपचारमा संलग्न डाक्टरहरुले भने विषाक्त पदार्थ नदेखिएको र गलत आरोप लगाइएको बताएका छन् ।

रुसको आन्तरिक उडानमा रहेका बेला नाभाल्नी बिहीबार बिरामी परेका थिए । लगत्तै कोमामा गएपछि उनको उपचारका लागि साइबेरियन सहर ओम्सकमा आपतकालीन अवतरण गरिएको थियो ।

विमानमा रहेका बेला बिरामी परेर कोमामा गएका रुसी सत्ताका कट्टर आलोचक नाभाल्नीको उपचार गरिरहेका डाक्टरहरु सुरुमा उनलाई जर्मनी जान नदिने पक्षमा थिए । अवस्था थप गम्भीर भएपछि उनीहरु नाभाल्नीलाई विमानमार्फत जर्मनी जान दिन सहमत भएका थिए ।

नाभाल्नीका समर्थकहरुले विमानस्थलको क्याफेमा दिइएको चियामा विषाक्त पदार्थ मिलाइएको आरोप लगाएका छन् । सत्ताले अपराध ढाकछोप गर्न खोजेको उनीहरूले बताएका छन् ।

४४ वर्षीय नाभाल्नी राष्ट्रपति भ्लादिमिर पुटिनका आलोचक हुन् । गएको जुनमा पुटिनले थप दुई कार्यकाल आफूलाई सत्तामा टिक्नका लागि मार्ग प्रशस्त गर्ने गरी संविधान संशोधन गरेका थिए । त्यसलाई नाभाल्नीले संविधानको उल्लंघन र ‘कु’ का रुपमा परिभाषित गरेका थिए ।

प्रकाशित समय ०९:३० बजे