टर्कीमा गत शुक्रबार गएको शक्तिशाली भूकम्पबाट ज्यान जानेहरूको संख्या ७६ पुगेको छ । टर्कीका राष्ट्रपति रेसेप तैयप एर्डोगानले टेलिभिजनमार्फत सम्बोधनका क्रममा भूकम्पबाट मृत्यु हुनेको संख्या ७६ पुगेको जानकारी दिएका हुन् ।

अहिलेसम्म क्षतिको सम्पूर्ण विवरण भने प्राप्त हुन नसकेको र उद्धार जारी रहेको उनले जानकारी दिएका छन् । टर्कीको इज्मिर सहरमा शुक्रबार ६.६ म्याग्निच्युडको भूकम्प गएको थियो ।

भूकम्पबाट ९६२ जना नागरिक घाइते भएको टर्कीको प्रकोप तथा विपद् व्यवस्थापन कार्यालयले जनाएको छ । विभागका अनुसार ती घाइतेमध्ये २१९ जना अहिले पनि उपचाररत छन् । भूकम्पपछि एक हजारभन्दा बढी परकम्प महसुस गरिएको थियो । तीमध्ये ४३ परकम्प ४ म्याग्निच्युडका भन्दामाथिको रहेको र स्थानीय बासिन्दाले महसुस गरेको जानकारी दिएका छन् । राष्ट्रपति एर्डोगानले पुरिएकाहरूको खोजी तथा उद्धारमा सहभागी हुन सार्वजनिक आह्वान गरेका छन् ।

प्रकाशित समय १३:५१ बजे