संसदीय दलको नेता चयन गर्न राष्ट्रिय जनता पार्टी नेपाल (राजपा)को राजनीतिक समितिको बैठक बस्दै छ । पार्टी केन्द्रीय कार्यालय वबरमहलमा बस्ने बैठकमा दलको नेता सर्वसम्मत चयन गर्ने, दलको विधान पारित गर्ने र पार्टी महाधिवेशनको मिति तय गर्ने एजेन्डामा छलफल हुने बताइएको छ ।
आकांक्षीहरुले अडान नछाड्दा प्रतिनिधिसभा निर्वाचन भएको सात महिना बितिसक्दा पनि राजपाले दलको नेता पाउन सकेको छैन । वर्ष दिनअघि ६ वटा दल एकीकरण भई बनेको राजपामा अध्यक्षमण्डल संयोजक महन्थ ठाकुर र सदस्य राजेन्द्र महतोले संसदीय दलको नेतामा आकांक्षा देखाएका छन् ।
निर्णय गर्दा अध्यक्ष ठाकुरले एकलौटी गरेको र पार्टीमा छलफल नगरेको भनी असन्तुष्टी जनाउँदै आएका अध्यक्ष मण्डलका सदस्य राजेन्द्र महतो दलको नेता छाड्ने पक्षमा छैनन् । यता, ठाकुर पनि पार्टीको संयोजक आफू रहेकाले दलको नेता आफैंले पाउनुपर्ने दावी गर्दै आएका छन् ।
संयोजक ठाकुर र सदस्य महतोले संसदीय दलको नेतामा आ–आफ्नो दावी कायम राखेपछि पटक–पकट तोकिएको पार्टीको राजनीतिक बैठकसमेत बस्दै नबसी स्थगित हुँदै आएको छ । संसदीय दलको नेतामा सहमति हुन नसकेपछि पटक–पटक तोकिएको बैठक स्थगित हुँदै आएको हो । यसअघि, २५ जेठमा हुने भनिएको राजनीतिक समिति बैठक स्थगित भएपछि आजका लागी बैठक बोलाइएको छ ।

प्रकाशित समय १५:५६ बजे