नेपाल कम्युनिस्ट पार्टी नेकपाले पार्टी संगठनको संगठनात्मक एकीकरण टुंगो लगाउन गठन गरेको शक्तिशाली कार्यदलका सदस्यहरुबीच मतभिन्नता बढेको छ । सदस्यबीच कुरो नमिलेपछि कार्यदलले प्रतिवेदन तयार पार्न सकेको छैन ।

मत बाझिएकै कारण दुई साताको समय पाएको कार्यदलको बैठक ५ पटक बसे पनि कुनै निष्कर्ष निस्किएको छैन । पुस १३ गते सकिएको स्थायी कमिटी बैठकले पार्टीको बाँकी सांगठनिक काम पूरा गर्न भन्दै नौ सदस्यीय कार्यदल गठन गरेको थियो । एकीकरणको प्रस्ताव नै तयार नपारी म्याद गुजारेको कार्यदल तीन साता पार गरिसक्दासमेत अन्यौलमै छ ।

नेकपाले स्थायी कमिटीले कार्यदललाई विधानका समस्या समाधान गर्ने, प्रदेश कमिटी हेरफेर गर्ने, पोलिट्ब्युरो गठनको प्रस्ताव तयार पार्ने, केन्द्रीय सदस्यको कार्यविभाजन, जिल्ला इन्चार्ज, सहन्चार्ज तोक्नेलगायतका जिम्मेवारी दिएको थियो ।

कार्यदलको पाँचपटक बसेको बैठकमा सबै विषयले प्रवेश नै पाएको छैन । प्रदेश कमिटी हेरफेर गर्ने प्रस्तावमै विवाद बढेपछि बैठक स्थगित हुने गरेको छ । बैठकमा विधान र प्रदेश कमिटी हेरफेर गर्ने तथा पोलिट्ब्युरो गठन गर्ने एजेन्डामा मात्रै छलफल भएको छ । ‘पोलिट्ब्युरो गठन कार्यका निम्ति प्रस्ताव तयार पार्दा केन्द्रीय कमिटी एकताकै मापदण्ड अपनाइनेछ, ६०–४० को अनुपातका आधारमा पोलिट्ब्युरोको प्रस्ताव तयार पार्ने विषयमा छलफल भइरहेको छ,’ कार्यदल सदस्य वेदुराम भुसालले भने ।

बैठकमा प्रदेश कमिटी हेरफेरबारेमा छलफल भए पनि संस्थापन पक्ष प्रदेश कमिटीका सदस्य हेरफेर गर्ने विषयमा सहमत हुन सकेको छैन । दोहोरो जिम्मेवारी नदिने भन्दै गण्डकी प्रदेशका मुख्यमन्त्री पृथ्वीसुब्बा गुरुङ र पाँच नम्बर प्रदेशका मुख्यमन्त्री शंकर पोखरेललाई प्रदेश इन्चार्जबाट हटाउने विषयमा छलफल सुरु भएको छ । नेपाल पक्षले उनीहरुलाई प्रदेश इन्चार्जको जिम्मेवारीबाट मुक्त गर्नुपर्ने अडान लिँदै आएको छ । तर, संस्थापन पक्षले प्रदेश कमिटीका सदस्यले शपथ खाएर जिम्मेवारी सम्हालिसकेकाले हटाउन नसकिने दाबी गर्दै आएको छ ।

आ–आफ्ना अडानबाट दुवै पक्ष टसमस नभएपछि कार्यदल अगाडि बढ्न नसकेको सदस्यहरु बताउँछन् । यस विषयमा ठोस छलफल के हुने भन्ने बारेमा भने आगामी बैठकबाटै थाहा हुने कार्यदलका सदस्य बताउँछन् । एक सदस्यले भने, ‘दुवै पक्षको आ–आफ्नै दाबी छ । यसलाई समाधान गर्न पुराना सदस्य कसैलाई पनि नचलाउने र बरु नयाँ १० प्रतिशत सदस्य थपेर जान सक्ने मध्यमार्गी प्रस्ताव आएको छ ।’

नेकपाको कार्यदलमा ओलीनिकट महासचिव विष्णु पौडेल, शंकर पोखरेल र रघुवीर महासेठ छन् । माधव नेपाल पक्षबाट योगेश भट्टराई, सुरेन्द्र पाण्डे र बेदुराम भुसाल छन् । त्यस्तै, पूर्वमाओवादी केन्द्रबाट रामबहादुर थापा, वर्षमान पुन र लेखराज भट्ट कार्यदलको सदस्य छन् ।

प्रकाशित समय १७:१४ बजे